Israel-in Hamas be turin palaite tir chhuak

Israel-in Hamas be turin palaite tir chhuak
Israel chuan Gaza-a inkahhai a awm theih nan leh mi hrente chhuah an nih theih nana Hamas nena inbe turin Pathianni khan a aiawhte chu Qatar-ah a tir.
Israeli Prime Minister Benjamin Netanyahu-a pisa chuan Qatar, US leh Egypt ramten palai hna an thawh mekah Hamas-in duh dan an neih thenkhatte ‘pawm theih loh’ awm mah se inbe tura sawmna chu pawm a ni tih a puang.
Zirtawpni zan khan Hamas chuan ni 60 inkahhai puan rawtna chu ‘tha an ti’ tih sawiin inbe turin an inpeih tih an lo sawi tawh bawk.
Hetih mek lai hian Palestinian hotu pakhat chuan an pawl hian inremna tluantlung a awm lo a nih dawn chuan indo tihtawp mai chu an pawm dawn lo tih a sawi bawk.
Inrinni tlai tawh takah khan Israeli Prime Minister’s Office chuan thuchhuah siamin inkahhai a awm theih nana kalpui tur rawtna zingah ‘Hamas-in duh an neihte chu Israel tan pawm theih loh’ tih an sawi.
Hetih rual hian, “Thil dinhmun thlirin Prime Minister Benjamin Netanyahu-a chuan Qatari rawtnaa mi hrente hruai haw an nih theih nana inbiak chu a pawm a, naktukah team hi an chhuak ang,” a ti.
A hmain Israeli thuneitu pakhat chuan tual chhung thuthar lakhawmtute hnenah Hamas duh dan chhang tur hian ‘thil tih tur a la awm’ niin a sawi.
Palaite hian Doha-a inbiakna neih tura lehlam lehlam aiawhtuten an duh leh an inrem lohnate sawi remsak an tum dawn a ni.
US President Donald Trump-a chuan inkahhai puan ngei a duh a, Zirtawpnia khan Hamas-in inbiak rawtna awm tha an tih thu an sawi pawh lawmawm tiin ‘karlehah Gaza-ah inremna’ a awm dawn niin a sawi a ni.
Trump-a hian Thawhtanni hian Netanyahu a kawm dawn bawk a, hetah hian thil thui zawk pawh an sawi ngei rin a ni.
Hamas-in Israeli an hren mek chhungte leh Gaza-a Palestinian-te pawhin inbiakna hi an ngaichang thup a. Inrinni zan pawh khan mi hren chhungte leh an thlawptu sang rual chu Tel Aviv-ah pungkhawmin inbiaka hruai haw ngei an phut.
Ruahmannaah chuan inkahhai chhung hian Hamas-in Israeli an hren dam lai 10 leh thi tawh ruang 18 an pe kir ang a, Israel-in Palestinian an mante an chhuah ve bawk ang.
Gaza-ah hian mi hren 50 an la awma ngaih niin an zinga 20 hi an la dam nia hriat a ni.
Ruahmannaah hian Gaza-ah puihna mamawh tawk a luh leh a sem leh buaipuinaah UN leh International Committee of the Red Cross tel tura tih a ni bawk.
Hamas-in inkahhai puana tel tura an rawt zingah Israeli sipaite hnuhdawh vek a tel nia sawi a ni bawk.
US-in a rawtnaah chuan Israeli sipaite hi Gaza atanga a tahtawla hnuhdawh a ni a; mahse, Hamas hotu pakhat chuan March thlaa inkahhai puan hmasak a tawp laia an awm hmunah khan kir lehnghal vek se an duh tih a sawi.
Hamas hian US hnenah hian Israeli thlawhna leh lei sipaiten beihpui an thlak an tihtawp vekna tur telh se an duh bawk.
Israeli sipaite hian October 7, 2023-a Hamas-in an ram beia mi 1,200 chuang an thah leh hren tura mi 251 an hruai phuba lak nan Gaza-a bei a. Mi 57,338 thi an awm tawh.