Israel-in Iran chhang let dawn ti

Israel military chief chuan Iran-in kar kalta tawp lama a beihna chu an chhang let ngei dawn tiin a sawi a. Mahse, eng tiangin nge tih leh engtin nge tih erawh a sawi lo thung a, chutih laiin khawvel ram hrang hrangte chuan Israel chu insum tura ngenin Middle East-ah buaina nasa zawk a chhuah an hlau hle thung.
April 13 khan Iran chuan Israeli chu missile leh drone hmangte in a kap vak mai a, hei hi Syrian capital Damascus-a Iranian consular building beiha Iranian general pahnihin nunna an chan phahna phuba lakna a ni. Chu mai ni lovin kum 1979 Islamic Revolution atanga an inhmelmak hnuah pawh Iran-in direct-a Israel a beihna hmasa ber a ni bawk.
Israeli military chief Lt. Gen. Herzi Halevi chuan Israel chuan hmalak dan chu a ngaihtuah mek tia sawiin Iranian chetlakna chu ‘chhan let ngei a ni ang’ a ti bawk.
Haveli chuan kimchangin engmah a sawi lo va. Army thupuangtu Rear Adm. Daniel Hagari pawhin Israel chuan ‘hun kan tihah kan bei mai ang’ tiin a sawi bawk.
An pahnih hian southern Israel a Nevatim air base tlawh dun ve ve in he air base hi Iranian missile in a denfuh zinga tel niin mahse a chhe nasa lo thung.
Prime Minister Benjamin Netanyahu chuan top officials te nen chhanlet dan tur ngaihtuahin inhmuhkhawmna an nei zui a. Ni hnih chhung zet chu Israel sorkar chuan eng mah thutluka puan zui emaw a la nei lo thung.
US House Majority Leader Steve Scalise nena inbiakna an neihah Netanyahu chuan ‘Israel chuan mahni inven nan a tul engkim a ti ang’ tiin a sawi thu a sawi.
Israeli leader ten chhanlet ngei an tum laiin Israel sorkar chu khawvel ram hrang hrang ten buaina nasa zawk a thlen an hlauh avangin insum turin an ngen nasa hle thung a.
US pawhin Israel chu insum tura ngenin diplomatic lam zawnga chet la turin a ngen a. Mahse, Maj. Gen. Pat Ryder, Pentagon press secretary chuan chhan let a duh dan chu Israel thu thu a ni a ti thung a. “Buaina nasa zel lo se kan duh ber a, helai region a kan sipai te humhim nan thil pawimawh leh tul te chu kan ti dawn a ni,” a ti.
Israel-in Iran chhang let se chu chuan helai region-ah buaina nasa zawk a thlen ang em tia zawhna chu Ryder chuan US chu ‘kan thawhpui Israel te nen inrawn tawn rengin kan awm ang a, mahse, helai region a buaina nasa zawk a thlen kan duh lo’ tiin a sawi.
US hian tun hnaiah Israel leh moderate Arab states tena inkawm ngeihna an neih theih nan hma a la nasa a, chu chu Iran beihletna zela ngaih a ni bawk.
US Central Command, Middle East a US military operation hnuaiah nasa zawka thawhhona siam niin Centcom chuan Israel Jordan, Saudi Arabia leh Arab ram dangte chu a thawhhopui a ni.
US, Britain leh Jordan te te chuan Iranian missiles leh drones kha an air forces te pawhin an lo kap thla tiin an sawi bawk a. Jordan hi America thian tha a ni bawk. Haveli chuan France leh ram dangte pawhin Iran drone chu an kap thla tia sawiin Iran chetlakna chuan Middle East-ah thawhhona tha a awm theih nan hun remchang a hawng zawk tiin a sawi.
Iranian weapons te chuan Saudi vansang pawh a paltlang tih Israeli military te map tih chuah chuan a pholang bawk a.
Israel chuan missile leh drone tam tak chu Israeli airspace pawna kahthlak a ni tia sawiin chu chu Saudi Arabia te pawhin an kapthla nasa tihna anga ngaih theih a ni.