Israel-in Rafah luhchilh dawn tho ti

Prime Minister Benjamin Netanyahu chuan Israel chuan Gaza city Rafah a luhchhuah hun tur ni a bituk tawh tiin a sawi.
Israel sorkar chuan southern city chu ti lo tura nawrna nasa tak karah luhchhuah a tumlui tho va, Rafah ah hian Palestinians 1.5 million vel an cheng mek a ni.
Netanyahu chuan Rafah luhchhuah chu a chhungah terrorist battalion awm te nawrchhuah an ngaih avangin tihmakmawh tiin a sawi bawk a.
World leaders te chuan Israel chu Rafah khawpui luhchhuah lo turin an ngen thung a. Thawhlehni khan Egypt, France leh Jordan sorkar te chuan thuchuah intawm siamin Israel in Rafah a bei lui a nih chuan nghawng hlauhawm tak awmin helai bial pum dinhmun a tiderthawng thei an ti.
Thawhtanni khan Israeli leader chuan Rafah khawpui luhchhuahah remtihna an pek tawh thu sawiin mahse abak engmah a sawi lo thung a ni.
Hetih lai hian Hamas leh Israel te chuan lung in tang inthleng tawnna a awm theih nan leh inkahhai a awm theih nan Egypt-ah inbiakna an nei mek bawk a.
“Cairo a inbiakna kimchang ka dawng a, kan thil tum tihhlawhtling turin theihtawp kan chhuah mek a, a pawimawh hmasa ber chu lung in tang te chhanchhuah leh Hamas te laka hnehna kimchang chan a ni,” a ti a.
“Hnehna kimchang chang tur chuan Rafah luhchhuah a ngai a, chuta terrorist battalion te chu nuai bo an ngai a. A hun kan bituk tawh” tiin Netanyahu chuan a sawi.
Hetih lai vek hian Israeli Defence Minister Yoav Gallant chuan Hamas te nena indona in thlaruk hmel a hmuh tawh laiin lung in tang te chhuah nana inremna siamna hun a ni a ti bawk.
Senior Hamas official te chuan Israeli rawtna siam te chuan an demand a phuhru lo tia sawiin mahse zirchian an remtih tho thu an sawi a.
“Israel-in a dinhmun engmah thlak danglam a nei lo va, chuvangin Cairo a inbiakna neih mekah til thar a awm lo” tiin Hamas official te chuan an sawi bawk.
Cairo a inbiaknaah hian CIA director William Burns pawh a tel ve a, Burns tel ve hian US in Israel chu inremna a awm theih nana a tur zia a lang tia sawi a ni.
Mahse US chuan Israel in Rafah luhchhuah a tumnaah engmah dodalna lantirna a la nei lo thung. Rafah-ah hian Gazans tam tak te indona tlansanin an awm mek bawk a.
Israel sorkar thutlukna siam hnuah ngaihtuah nawn leh turin Egyptian President Abdel Fattah al-Sisi, French President Emmanuel Macron leh Jordan King Abdullah II te chuan thuchhuah intawm an siam nghal a.
“Gaza indona leh mihringte tawrhna rapthlak thleng mek hi tihtawp ni nghal rawh se” tiin hruaitu pathum te chuan ngenna an siam a. A rang thei ang bera Gaza-ah tanpuina pek luh ni se an ti bawk.
Hei bakah hian UN Security Council resolution chuan inkahhai awl nghal se a tih thu leh Hamas tena mitang an kawl te chhuah zalen nghal tur an ti bawk.
Egypt leh Jordan te hi Israel nena ramri nei ve ve niin Middle East region indona awm rengnaa ram pawimawh tak pahnih an ni.
Hamas-te chuan southern Israel a ramri bul hnaia Israel khua leh tui te chu nikum 7 October khan bei thutin mi 1,200 chuangin nunna an chanphah a. Mi 250 chuang mitang angin an hruai lui bawk.
Israel chuan heng Hamas tena mitang an hruai zingah 130 an la dam tia sawiin mi 34 chu an thi tawh a ti bawk a.
Israel-in phuba laa Gaza a run zui naah Gazans 33,000 chuangin nunna an chan tawh a, heng zinga a tam ber te hi civilian te an ni tiin Hamas enkawl health ministry chuan a sawi.
Gaza khawpui chu tam tlak theih rengna a ni tia sawiin Oxfam te chuan hmarlama mipui 300,000 dan beha awm te chuan January thla atang khan ni tin 245 calories bak an pum chhungah an la lut lo a ti.
Israel chuan Gaza chhunga tanpuina lut tur chu nasa takin a dang a, UN agencies Gaza a awm te chu tanpui ngai te hnen thlentir lovah a puh bawk a, tanpuina lutte chu Hamas ten an la zel a ti bawk a ni.