Israel-in Rafah luhchilh tum bur
Gaza a Israel leh Hamas tena inkahhaina an neih theih nana inbiakna neih chuan hma a sawn thei meuh lo tiin mediator Qatar chuan a sawi.
Prime Minister Mohammed bin Abdulrahman Al Thani chuan beiseina an la neih thu sawiin ‘mahse hunin min duhsak lo a ni,’ tiin a sawi a.
Hetih lai hian Israel prime minister chuan khawvel ram hrang hrang ten ti lo tura an nawr chungin Rafah ground invasion chu an kaltlangpui dawn tho a ti thung a. Hamas te chuan inkahhaina awm theih loh chhanah Israel an puh thung.
Cairo khawpuiah inbiakna neih niin US, Israel, Egypt leh Qatar senior official te chuan inkahhaina a awm theih nan hma an la a.
“Tun hnaiah hmasawnna kan nei thei lo hle a, mahse, sawi tawh angin beisei erawh kan la nei reng a, kan chhunzawm zel ang” tiin Sheikh Mohammed chuan Munich Security Conference neihnaa world leader-te hnenah a sawi a .
“Inremna liantham leh huapzo tak kan neih theih ngei ka ring a, inremna siam tumah humanitarian thila harsatna te kan la nei a ni,” tiin a sawi bawk.
Inkahhaina chu Hamas tena an mitang kawl te chhuah leh chhuah lohah ngawt a innghat dawn lo a ti bawk a. “Vanduaithlak takin mitang chungchang hi ram tam tak tena an hman sual a ni a. Inkahhai a awm theih nan hostage deal chu tihmakmawhah an ngai a ni,” tiin a sawi.
Israeli Prime Minister Benjamin Netanyahu chuan US President Joe Biden ngenna avangin negotiator a tirh thu sawiin mahse Hamas te ngiat chu a awm ang lo lutuk a ni tiin a sawi.
Hamas-te chuan inkahhai a awm theih nan ngiat hrang hrang neiin chung zingah chuan lung in tang inthleng tawn te, Israel sipai te hnuhkir te bakah inkahhai chu thuang thuma kalpui te a ni.
7 October 2023 khan Hamas silai kengte chuan Israel lutin mi 1,200 chuang tihlumin mi 240 vel an hruai lui bawk a, Israel chuan chhang let nghalin Gaza chu a run zui a ni.
Hamas enkawl health ministry chuan Gaza indona avanga nunna chan mi 28,800 an chuang tawh tiin a sawi bawk.
Kar kalta Inrinni khan Tel Aviv-ah Netanyahu chuan press conference neiin an tum ber chu Hamas te nuai chimih a ni tia sawiin an tum an hlen hma chuan sipaite chuan an chhunzawm zel dawn tiin a sawi bawk a.
Rafah khawpui bei lo tura nawrtu ram te chu sawiselin Israel chu indona kal mekah chaklo tura hrilh ang an ni tiin a sawi a. Hostage deal siam pawh ni se a sipaite chuan Rafah chu an luhchhuah dawn tho tho a ti bawk.