Israel-in southern Gaza a sipai dah titlem

Israel military te chuan southern Gaza-a sipai a dah a tihhniam thu sawiin brigade khat chauh dah an ni tawh tiin a sawi a. Mahse Gaza ah chuan thahnem tawk an la awm ang a ti a.
“Indona kalpui mekah stage dang kan chuangkai mek a ni” tiin Israel Defense Forces (IDF) spokesman Lt Col Peter Lerner chuan a sawi a.
Israel-in sipai a dah a tihhniam chu indona in tawp lam a pan dawn nia lang ai chuan tactical thil zawk nia ngaih a ni.
Pathianni khan Israel leh Hamas te chuan inkahhai a awm theih nana inbiakna Cairo a neih turah aiawh an intirh ve ve tur thu an puang bawk a.
7 October, 2023 a Haas tena Israel ram luta mi 1,200 chuang tihluma lungin tang mi 250 chuang a hruai atangin thlaruk a chuang tawh a. Israel chuan Gaza ah a mi leh sa 130 te chu hrenin an la awm mek tiin 34 te erawh an thi tawh a ti bawk.
Israel-in a beihletnaah Gazana 33,000 chuangin nunna an chanphah tawh niin Hamas enkawl health ministry chuan a sawi a, nunna chan tam ber te chu civilians te an ni a ti bawk.
Gaza chu tam tlak reng theihna dinhmunah a ding mek niin Oxfam te chuan sawiin Gaza hmar lamah mi 300,000 chuang te chu January thla atang khan danchepa awmin nikhatah 245 calories chauh laluta ringin an awm a ti.

Indona a la tawp lo
Lt Col lerner chuan a sipai te chu an inawm chhawk tawh dawn tia sawiin a chhan pawh Khan Younis mission an zo fel tawh a ti a.
Khan Younis chu Israel in thla a thla a bomb tawh niin khawpui chhung leh a chhehvel te tihchhiatin a awm nasa hle.
“Sipai kan dah kan titlema mahse operation la neih zeuh zeuh ngai reng a ni thung. Rafah chu tunah Hamas te tamna ber a ni tawh a, khawi hmunah pawh Hamas te theihna chu kan chhutchhiat a ngai a ni” tiin a sawi bawk.
Israeli Defence Minister Yoav Gallant chuan Khan Younis operation an neih chu a hlawhtling takzet tia sawiin Hamas te chu Gaza pumah military organisation an nihna angin an awm thei tawh lo tiin a sawi.
Israel chuan tun thlegnin chhim lama Rafah khawpui chu a la bei lo va, mahse, hun rei tak ata tawh lei lam atanga a luhchhuah tur thu a sawi thung a. Rafah ah hian Palestinians maktaduai chuang an cheng mek a ni.
Rafah ah hian Gaza atanga tlanchhia tam tak an awm bawk a, chung mi te chuan Rafah a chen reng ai chuan an chenna in te tihchhiat pawh ni se puan in kaiha Gaza a chen an thlan zawk thu an sawi.
Hetihlai hian inkahhai a awm theih nan khawvel ram hrang hrang ten Israel an nawrna hle a, US pawhin Israel chu a nawr nasa a, Gaza a indona a Israel a thlawpna chu tanpuina pekluh tihtam leh civilian te thihna tihtlem nasat danah a innghat ang a ti.
Thlaruk chuang indona kalpui a nih tawh hnuah Israeli Prime Minister Benjamin Netanyahu chuan Israel chu ‘hnehna a chang tep tawh’ tia sawiin Israeli mitang te chhuah zalen an nih hma chuan inkahhai a awm dawn lo a ti bur bawk a.
“Indonaah kan hlawhtling hle a, Hamas in battalion a neih 24 zing 19 kan nuaibo tawh a, achung zingah chuan an senior commander te pawh an tel a ni” tiin a sawi.
Hetih lai hian Israel ah chuan Netanyahu duhlohna kawngzawh mi sang tam takin an nei a, Gaza a lung in tang te chuan chhanchhuah ngei an phut a ni.
Tel Aviv a Netanyahu duhlohna kawngzawhna neihah mi 100,000 chuang an tel nia sawi a ni a, Jerusalem ah te pawh lungawilohna lantir a ni bawk.
Israel in sipai a hnuhdawhna chhan berah US chu ngaih niin a bik takin karkaltaa World Central Kitchen aid worker te gaza a Israel in an convoy beia a tihhlum khan US chu Israel a nawr nasat zual tir nia ngaih a ni.
Israel thil tum ber nia ngaih chu Palestinian maktaduai khat leh a chanve vel te chenna leh Hamas thahnem tak la awmna chu luhchhuah a ni.
Mahse, US chuan Israel chuan Rafah a beih chuan civilian te himna ngai pawimawhin ruahmanna fel a nei tur a ni a ti a, mahse, Israel ruahmanna siam chuan US a tihlawm meuh loh avangin Israel chuan Rafah la luhchhuah tum tho siin a inhnukdawk thenta rih nia naih a ni bawk.
Hei bakah hian US chuan Cairo a inbiakna neih hunah Egytpian intelligence head, Qatari prime minister te pawh telna turah lung in tang inthleng tawn a awm theih nan nawr nasat hle a tum tia sawi a ni bawk.
Cairo inbiakna neih turah United States chuan inkahhai a awm ngei theih nana nawr a tum a, Israel thung chuan Hamas tena Israel an hren te an chhuah loh chuan inkahhai a duh lo thung.