Israel leh Iran boruak chhe zel thei

Middle East Region boruak tang lutuk chuan zuai lam a pan riha ngaih niin kar kalta Zirtawpni zinga Iran in beih a tawh chungchangah Israel chuan a tih a nih thu a sawi lo va.
Iran military leh political leader te pawhin nasa taka sawi hniam tumin thil tihchhiat liantham engmah a awm lo an ti bawk.
Mahse karkalta Zirtawp a Iran nuclear facility in beih a tawhah eng ralthuam nge hman a nih tih leh engtiangin nge tihchhiat a neih tih chu tun thlengin hriatfiah theih a ni lo.
American official te chuan missile strike ngei a ni an ti a, mahse Iranian official te thung chuan northwest Tabriz a Isfahan beihna chu drone a ni an ti ve thung.
“Micro air vehicles niin kahhtlak a ni a, engmah tihchhiat emaw hliam tuar pawh an awm lo” tiin Iran Foreign Minister Hossein Amir-Abdollahian chuan a sawi.
Mahse Israel chuan a quadcopter te chu Iran ram chhungah tum tam tak operation neih nana a hman fo an ni thung a, a hlawhtling ziah a tihtheih bawk. Tun tuma a target chu Isfahan central province niin he province hi Natanz nuclear facility, Isfahan Nuclear technology Centre leh major air base awmna a ni. Helai hmun hi Iran in 14 April a Israel drone hmanga beihna hmun kha a ni bawk.
Chumai bakah industry hmunpui awmna niin drone leh ballistic missile siamchhuahna factory lian te awmna hmun a ni bawk.
Chuvangin Israel in beitham taka a beiha chu warning a pekna anga ngaih niin Israel chuan Iran hmunpui pawimawh te bei thei turin intelligence leh asset a nei tha tawk tia a vauna anga ngaih a ni bawk.
US official te chuan Israel missile chuan Iran air defence radar system, Natanz humhimtu chu a bei tiin a sawi a. Mahse, a hlawhtling chiang em tih chu hriat mai theih a ni lo thung.
Israel in engmah sawichiang duh lova ngawih a chuh tlat bawk chuan ngaihthatlohna a siam bawk a. Iran hardline President Ebrahim Raisi chuan Zirtawpnia thusawina a neihah Israel strike lam engmah sawi a nei lo bawk.
April 14 a drone hmanga Israel beih a nih kha chuan pawr takin Emrahim Raisi chuan Iran chuan amah beihna chu a chhang let zel ang tiin a sawi kha a nia. Iran hian tun hma zawng chuan amah tihthinrim a nih pawhin chhang let nghal mai lovin kum khat hnuah te phuba la chauh thinin a ‘strategic patience’ chu a chhuang hle thin a ni.
Tunah erawh ‘strategic detreence’ kalpui tawhin 1 April a Damascus khawpuia a diplomatic consulate beihnaa Revolutionary Guard hruaitu lawk pasarih te thihna chu a chhang let nghal a ni.
Israel pawhin tun hnaiah Syria leh Lebanon a Tehran asset pawimawh te a ralthuam dahkhawmna te, building, base leh supply route mai piah lamah top-ranking official te chu a tihlum zui tawh bawk.
Tunah erawh boruak a dai rih a ni thei a, mahse, engtia rei nge a daih ang tih chu zawhna a ni a, tun dinhmunah chuan tute mahin indona turu tak kalpui chu an duh rih lova ngaih a ni thung.
Gaza indona a la kal mek zel a, Palestinian nunna chan an tam tawh hle. Gaza chu tam tawk mai thei dinhmunah a ding tawh bawk a. Inkahhai awm nana inbiakna a hlawhchham zel a, Israeli mitang te chhuahin an la awm lo bawk a. Hamas tawmkhawmna hnuhnung ber Rafah khawpui chu Israel in a luhchhuah dawn em tih pawh a chiang thei chuang lo.
Iran in ‘Axis of Resistance’ tia a sawi a proxies te Lebanon a Hezbollah te, Iraq leh Syria a Iran thlawp militia te, Yemen a Houthis te chuan nitin deuhthaw Israel an la bei reng bawk. Hei vang hian Middle East ah sawi chian theih a awm lo an ti hial a ni.