Issue based-in Parliament thurel kan thlawpin kan thlawp lo ang – Lalduhoma

Delhi-ah zawmpui an neih loh avangin issue based-in Parliament thurel an thlawpin an thlawp lo mai dawn tih chief minister Lalduhoma chuan a sawi.
Thawhtannia ZPM party-in Lok Sabha MP inthlan campaign bul tan inkhawm an hmannaah Lalduhoma chuan, ZPM-in Delhi tlangah zawmpui an nei loa, hei hi an danglamna a ni, tiin, “Issue based-in Parliament thurel pawh a thlawpin a thlawp lo mai dawn a, hei hi kan tan chuan a him ber. Central nena tha taka thawh dun kan duh a, amaherawhchu kan ram, kan hnam leh sakhaw tana him lo thilah chuan huai takin kan dodal mai dawn a ni,” a ti.
ZPM chu tualto party an nih avangin tuna an dinhmunah hian an chiang a, an awm reng dawn tih a sawi a. He an dinhmun hi chiang taka hriatsak turin mipui pawh a ngen tih a sawi.
MP chu palai hna thawktu tur, a tirtu Mizoram sawrkar nena thawk dun thei a ni dawn a, project umzui ngai a tam hle thin tih chief minister hian a sawi a. Hetiang bawhzuitu atan MP tha kan mamawh, tiin, “Zofate hmun hrang hrangah kan inzar darh nasa ta a, hengte enkawl thei tur hian MP tha kan mamawh em em a, tawng lama harsatna nei lo, hnamdang kara lo khawsa reng tawh leh hre em em MP candidate kan nei hian hmasawnna kawng tinrengah nasa takin kan tangkaipui ngeiin ka ring a, kan ramin a mamawh tak MP min thlantlin sak turin mipui ka sawm a ni,” a ti.
ZPM MP candidate Richard Vanlalhmangaiha chuan Zoram mipuiin ZPM enchhin an tum loa, en tak tak an tum, tia sawiin, “Mipuiin min beisei anga hna pawh kan thawh ngei ngei a ngai. MP-te hi central leh state inkar palai tur an ni a, Pathian zara ka tling a nih chuan he hna hi rinawm tak leh tha taka thawh ka tum. Central atanga project leh scheme hrang hrang a tam thei ang ber hai chhuah kan tum dawn a , sum hi dik taka hman atan chuan central hian a ui reng reng loa, rinawm taka hna thawh chuan project hai chhuah leh hmasawnna thilah harsatna a awm dawn lo,” a ti.
Prime minister emaw chief minister emaw thu niloin Pathian thu a ngaipawimawh dawn niin ZPM candidate hian a sawi. House chhungah a ni emaw House pawnah a ni emaw kan ram, kan hnam leh kan sakhua tan theihtawp a chhuah dawn tih a sawi a. ZPM policy – Hand Holding policy tihlawhtling turin theihtawp a chhuah dawn tih a sawi a ni.