Istanbul-a May Day protest-ah mi za tel man

Istanbul-a May Day protest-ah mi za tel man
Istanbul-a May Day lungawi loh lantirnaah mi za tel man an ni a, thuneituten a tudai turin police officer 50,000 chuang an tir.
Kum 2013 atanga lungawi lohna lantir phal lohna hmun, Taksim Square an pan khawm theih loh nan vantlang inkalpawhna pawh tihtawp vek a ni.
Turkish khawpuia thil thleng video-ah chuan riot police leh lungawi lohna lantirtute chu an innawr nasa hle a, nasa taka au rualin police-in tharumin an mi mante chu bus-ah an nawr lut bawk.
March thlaah khan khawpuiah hian eptu mayor, Turkey President Erdogan-a elpui ber ni bawk, Ekrem Imamoglu-a man duh lohna lantirna lian tak a lo awm tawh bawk.
May 1 bikah hian kum tin hnathawktu leh pawl hrang hrangin International Labour Day lawmna pualin ram hrang hrangah eng emaw nawra punkhawm an huaihawt thin.
Istanbul laili, Taksim Square-ah hian inkharkhip niin police tam tak an awm bakah a pawhtu kawngpui dan nan thirin hungna an siam bawk.
Thuneitute chuan kuminah hian punkhawmna lian zawk a awm an ring sa a, chutiang a thlen lohna turin venhimna nasa taka tihkhauh niin riot police pawh tam tak an chhawp phah.
A nih dan pangngaiah chuan square hi khawpuia hmun lun lai ber a ni a; mahse, kuminah hian mi an rehin thingpui dawr leh dawr dang pawh an khartir.
Police kaltlang tur hian phalna neih a ngai a. Labour union thenkhat chu Taksim-a an luh phalsak an ni a, banner sen leh pangpar an keng hlawm.
Kum 1923-a Turkey a din tan hriat rengna, Republic Monument hmaah dingin thusawitu pakhat chuan khuahkhirhna an siam chu a sawisel a. A bul lawkah tui phuh theihna nena inring truck a ding bawk.
Square pawhtu kawngpuiah chuan kein khualzin a indawta kaltiur an ni a, taxi thlen theih chin thleng an bungrua nen an kal a ngai.
May 1 hma ni eng emaw zat atang tawh khan square hi khar a ni tawh niin AFP news agency chuan a tar lang.
Nilaini khan square-a lungawi lohna lantir tuma puh mi 100 vel man an ni tawh.
Khawpui thuneitute chuan Ningani khan phalna nei lova pungkhawm nia an sawi mi 382 an man leh.
Mihring dikna chanvo humhalhtu, Amnesty International chuan Turkey chu Taksim-a inkhuahkhirhna an kalpui hlip turin an ti.
March thlaa Imamoglu-a man a nih khan amah tantu sang tel chu Istanbul kawtthlerah an pungkhawm a, ei rua puha manin lung inah dah a ni a, nasa takin a pha.
Politics thil avanga man niin a insawi a, sorkar chuan phain Turkish court-te chu an thunun theih a ni lo tih an sawi ve thung.
Kum 2019 atanga mayor ni tan, Imamoglu hi kum 2028 inthlan tura Erdogan-a khing thei ber tura ngaih a ni a. Lung ina a tan lai hian eptu party chuan an candidate atan an puang nghe nghe.
Erdogan-a hi kum 20 chuan an ram roreltu a ni tawh a, prime minister a nih phawt hnuah kum 2014 atangin president a ni zui a. Kum 2028 hnu lamah chuan an danpui an tidanglam a nih loh chuan president a ni thei tawh lo.