Italy-ah Cricket khelh remti bau lo

Italy-a Adriatic coast a ni sa tak hnuaiah Bangladesh atanga Italy-a lut thianzahote chuan concrete chhuatah cricket an khel a.
Triste airport hnai lawka awm Monfalcone khaw pawn deuhah cricket chu khelin a chhan ber pawh khawchhunga khelh khapsak an nih vang a ni a. Khawchhunga cricket khel lui te chu 100 pound chawi tura tih zel an ni.
“Monfalcone chhunga kan khelh chuan police ten min tihtawpsak daih tawh ang” tiin cricket team captain Miah Bappy chuan a sawi a.
A hma lawk pawhin Bengali tleirawlte chu an national sport cricket local park a an khelh avanga man an nih tawh thu sawiin security camera hmanga enthlak reng an nih thu leh police-te chu anmahni man tura an inpeih at reng thu a sawi bawk.
“Cricket chu Italy tan a ni ve lo an ti a. Thudik tak zawk chu, foreigner kan nih vang mai a ni,” tiin Miah chuan a sawi a. Cricket khelh khapna chuan Monfalcone a thuk taka boruak tang awmzia a pholang zawka ngaih a ni.
He khuaah hian Italy hmun dang ang lo takin mipui cheng 30,000 zinga hmun thuma thena hmun khat lawih chu foreigner an ni a. A tam ber te chu Bangladeshi Muslim te niin kum 1990 chhova giant cruise-ships hmanga Italy a lutte an ni.
Hei vang hian Monfalcone a cultural essence chu a derthawng a ni tiin mayor Anna Maria Cisint, far-right League party mi leh sa chuan a sawi a.
Anti-immigration sentiment a aupui hmanga thlan tlin niin a tum ber chu Monfalcone khua humhim leh Christian values dinchantir chu a ni.
“Kan history nuai rehin a awm mek a, awmzia awm lova chhuah mek niin engkim a chhe zawngin a inthlak danglam a ni” tiin Anna Maria Cisint chuan a sawi.
Monfalcone-ah hian Western thawmhnaw inbel Italians leh Bangladehis te shalwar kameez leh hijab khum te nen an inpawlh nuai tawh a. Bangladeshi restaurant leh halal shops te pawh awmin South Asian community te chauhin an hman cycle path network te pawh a awm a ni.
Officer term hnih chelh mek Cisint chuan town square a Bangladeshi te thutkhawmna thin thutthleng te chu a dahsawn tawh bawk a, beach a Muslim hmeichhia te thawmhnaw inbel pawh a ngaih theih loh thu a sawi.
“Islamic fundamentalism chak takin a kal mek a ni. Hmeichhiate ngaih pawimawh lohna leh mipa tena an hnuaichhiahna culture a awm mek,” tiin a sawi bawk.
Cricket khap chungchangah mayor chuan cricket pitch siamna tur sum le hmun ruak a awm lo va, cricket ball chu a hlauhawm bawk tiin a sawi a. Bangladeshis tena an national sport an khelh chu a remtihloh thu sawiin engmah pek let min nei lo tiin a sawi a.
“He khua hi pek let an nei lo, kan community pek let an nei hek lo. An duhna hmun khawiah pawh Monfalcone tihlohah chuan an duh chuan cricket an khel thei ang,” tiin a sawi a.
Mayor ber chuan Muslim laka a rilru puthmang avangin thaha vauna a tawk bawk a, chuvang chuan darkar 24 chhung police tena an venhimna hnuaia awm mek a ni.
Miah Bappy leh a cricketer thiante chu Europe a lian ber leh khawvel huap pawha lian ber pakhat lawng tukna Fincantieri shipyard a thawk tura kal an ni a.
Mayor chuan company te chu ‘wag edumping’ market level aia hniama hlawh pe a, foreign worker te chhawrah puhin, an hlawh chu a hniam em avangin Italian te tan thawh duh ve chi a ni lo tiin a sawi bawk.
Mahse Fincantieri shipyard director Cristiano Bazzara thung chuan hnathawktute hlawh an pek chu Italian law mil thlap tiin a sawi ve thung. “Trained workers te kan hmu zo lo a ni. Europe-ah chuan thalai shipyard-a thawk tur hmuh a har lutuk” tiin Bazarra chuan a sawi thung.
Italy hi Europe-ah pawh naupang tlemna ber niin nikum khan nausen 379,000 an piang a, hmeichhia pakhatin 1.2 children average a nei ang zel chauh an ni.
Italy chuan labour lamah tlakchhamna nasa tak tawk bawkin a work force tlahniam zelah Italy chuan kum 2050 ah chuan foreign worker 280,000 a mamawh tawh dawn tia chhut a ni.
Italy Prime Minister Giorgia Meloni chuan a tirah immigration tihtlem a tum thu a sawi chungin a kaihhruai far-right Brothers of Italy chuan non-EU workers te a tipung mek thung a.
Mahse Anna Maria Cisint chuan Bangladeshi Muslim community te nun dan chu antive-born Italians te nen inmil thei ngang lo tiin a sawi.
Monfalcone bikah mayor in Islamic centre pahniha a tawngtaiho a khap avangin boruak a tang hle bawk a. “He khuaa mipui ten thlalak leh video tam tak min thawna Islamic centre-ah mi tam tak tawngtaiin building khatah mi 1,900 chuang te an tawngtai a. Kalna kawngah bike tam tak kalsanin, ni khatah ring takin tum nga zan thlengin an tawngtai a ni,” tiin a sawi.
Chu chu Mayor Cisint chuan tualchung mite tana a fair lo tia sawiin tawngtai a khapsak chhan chu urban planning regulation vang a ti bawk a. Islamic centre te chu sakhua biak nana siam a ni lo tiin a sawi bawk a, chung mite hna pek chu a hna a ni lo a ti bawk.
Islam chu Italian law hnuaia official status nei sakhua 13 zinga tel a nih ve loh avangin pathian biakna hmun neih mai chu thil harsa tak a ni bawk.
Monfalcone a Bangladeshis te chuan mayor thutlukna chuan Muslim community-ah nghawng na tak a nei tiin an sawi a. “Mayor berin Begalis te chuan Italy Islamify an tuah a ngai a, a nihna takah chuan kan nun danin kan nung mai chauh a nia,” tiin kum 19-a upa Meheli, Dhaka atanga lut chuan a sawi a, western thuamhnaw inbela Italian tawng nal taka a hman thiam thu a sawi bawk a. Mahse, tichung chuan Bengali heritage a neih avangin kawtthlerah diriamin a awm fo tiin a sawi bawk.
Miah Bappy chuan kuminah Italian passport a neih theih a beisei a, mahse, Monfalcone-ah a cheng zui zel dawn em a chian loh thu a sawi thung a. “Buaina leh harsatna kan siam ngai lo va, tax tha takin kan pe bawk a. Mahse, kan chen ve an duh lo a ni,” tiin a sawi.
Miah Bappy chuan Bangladeshis te chuan Monfalcone chu an chhuahsan vek a nih chuan shipyard te chuan lawng pakhat siam tur pawhin kum nga an mamawh ang tiin a sawi ve thung.
Summer lai khan regional court chuan Monfalcone-ah Islamic centre pahnih din mai bakah tawngtaiho remtihna a pe a. Mahse, Monfalcone mayor chuan zawm tum lo thungin ‘Islamisation of Europe’ chu Italy piahlam thlengin kalpui mek a ni a ti ve tlat thung.
Tunah phei chuan Mayor Cisint chu European Parliament member atana thlantlin niin Brussels ah pawh a ngaihdan sawi theihna a nei zui dawn tawh bawk.