Italy-in Gulf ramte hnenah air defence thawn dawn

Iran-in thlawhna hmanga beih nasat avangin Italy chuan Gulf ramte hnenah air defence-a puihna thawn a tum niin Prime Minister Giorgia Meloni-i’n a sawi a, Rome chuan he biala a mipui leh sipaite himna bakah energy himna a ngaih pawimawh thu a sawi.
Meloni-i hian Ningani khan radio station RTL 102.5 hnenah, “UK, France leh Germany ang bawkin Italy pawhin Gulf ramte hnenah tanpuina thawn a tum a, a bik takin ram venhimna lam, air defence lamah tanpuina thawn a tum a ni,” a ti.
Tanpuina thawn a tum hi Gulf ramte nena palai hmanga an inzawmna that vang chauh ni lovin Italian-te leiah an awm vang a nih thu a sawi a. Gulf-ah hian Italian sang tam tak an cheng a, sipai pawh 2,000 vel an dah thu a sawi bawk.
“Hengte hi kan humhim duh leh kan humhim tur an ni,” tiin Meloni-i chuan a sawi a, Gulf bial chu Italy leh Europe-a energy lak luh leh thawn nan pawh a pawimawh hle tih a sawi.
Meloni-i hian an ram chhunga US sipai hmunpui awmte hman theih dan tur chungchanga zawhnate pawh chhangin, Italy leh a thurualpui ramte chuan ram pahnih inremna awm tawhte chu an zah hle tih a sawi.
“Inremna siam tawha tar lan tawhte chu zawhna dang siam belh ngai lo lova kalpui theih tihna a ni a, chu chu mi zawng zawng tan a hman theih ka ring a, keini pawh chutiang bawk chu a ni,” a ti.
Italy-ah hian kum 1954-a inremna siam angin US-in sipai hmunpui a nei a, hun kal zelah tihchangtlun zel a ni bawk a. He inremna hnuaiah hian Meloni-i chuan technical thilah inkalpawhna leh bomb hmanga beihpui thlakna tih lohvah chuan a luahtuten thu an nei tih a sawi.
Italy-a an hmunpuite chu US-in zau zawk hman tura a ngen a nih chuan sorkarin thutlukna siam turin thuneihna a nei tih Meloni-i chuan sawi a, thutlukna siamnaah chuan parliament pawh a inrawlh a ngai dawn tih a sawi.
Nilaini thleng khan hetianga hman tura dilna hi an dawng lo niin a sawi a “Indonaah kan tel lo va, lut ve pawh kan duh lo,” a ti.