ITF World Champion award an sem Djokovic leh Sabalenka kum a ni

International Tennis Federation (ITF) chuan kumin grand slam tournament hrang hranga an chetthat dun em avangin Novak Djokovic leh Aryna Sabalenka-te chu mipa leh hmeichhe thlura ‘world champion’ nihna title hlu bik an hlan.
Kumin major tournament palia vawithum champion thei Djokovic hian record siamin a tum riatna atan he men’s singles award hi a dawng tih ITF thuchhuan chuan a tarlang.
Kum 36 mi Serb hian a career-ah grand slam title 24 la tling tawhin, mipa leh hmeichhia thliar loa major tophy kawl hnem ber record siamtu Margaret Court-i major singles title lakzat a nihrualpui bakah record thar siamin kumin hian a vawisarihna atan kumtawp mipa tennis hmawrbawkna ATP Finals title a la a, world number one ni chungin season a khar hneh hle!
Belarusian Sabalenka thung hian kuminah a grand slam title hmasaber chu Australian Open kaltlangin a hlawhchhuak a, US Open runner-up niin, major tournament dang pahnih French Open leh Wimbledon-ah semi-final a thleng bawk.
ITF title chang thei tura season hmang tha zet Sabalenka hian WTA Finals hlawhtlinna changin Iga Swiatek kuta number one nihna a chhuhsak a, No. 1 ni chungin kum a khar a, ITF atangin world champion nihna title nen chawlh a hmang thei dawn ta a ni.
A zawna US Open title vawithum la tling thei Rajeev Ram leh Joe Salisbury kutah men’s doubles award lutin, Wimbledon runners-up Storm Hunter leh Elise Mertens chuan women’s doubles title an chang thung.