ITI zirchhuakte inelnaah Mi 15-in lawmman an dawng

Labour, Employment, Skill Development & Entrepreneurship (LESDE) department kaltlanga buatsaih Industrial Training Institute (ITI) atanga zir chhuak, thiamna hmanga mahni kutkawiha ei zawn tumtute puih nana intihsiakna ‘KAWTCHHUAH – 2024’ tum hnihna chu January 23-25 chhung khan buatsaih a ni a. A kharna hi LESDE minister Lalnghinglova Hmar chuan a hmanpui.
Minister chuan STRIVE kaltlanga ITI tihhmasawn nana hmanraw pawimawh bungraw hrang hrang 112, cheng nuai 44.47 man chu ITI Aizawl principal Vanlalhruaia Sailo hnenah a hlan a. KAWTCHHUAH 2024 intihsiaknaa tithate hnenah lawmman a sem bawk.
ITI atanga mi 4767-in thiamthil an zir chhuak tawh leh heng zinga zaa 50.61 in eizawnna ngelnghet an nei thei chu ropui a tih thu Lalnghinglova Hmar hian a sawi a. Sawrkarin tih takzeta hmalatute puih a tum thu leh ‘Bana Kaih’ policy a kalpui dawn thu sawiin, ITI zirlai leh zirchhuakte chu eizawnna ngelnghet nei thei tura theihtawp chhuah turin a fuih a ni.
Tanpuina sumfai dawngte chu a lawmpui tih sawiin, a taka hnathawh nana hman tangkai tum turin a chah.
KAWTCHHUAH -2024 intihsiakah hian tel tuma hming pe lut mi 44 awmin, heng zinga 30 hian intihsiakna an hmachhawn a. Stage hnihah thenin, thiamthil neih leh an thiam dan chin (skill competency test) leh a taka eizawnna an kalpui dan tura ruahmanna an siam (business plan) te panel member-ten an endik.
Endikna atanga titha thlanchhuah mi 15 hnenah citation leh lawmman sumfai nuai khat theuh sem niin, a vaiin nuai 15 sem a ni.