Jack Harlow “Lovin on Me’ a Hot ber

Jack Harlow hla hit ‘Lovin on Me’ chu Billnboard Hot 100 (singles) chart-ah a No.1 a, he chart-ah hian a zawn ni kher lovin kar li a No.1 tling ta. Hetihrual hian Teddy Swims ‘Lose Control’ chu No.4-ah a invawrh kai a, he chart top 5-a a lan vawi khatna a ni.
Billboard Hot 100 chart hi kar khat chhunga US-a hla lar dan tehna niin, chart ranking siam nan hian all-genre US streaming (official audio leh official video), radio airplay leh sales data te chu tehna pawimawh a ni.
Jack Harlow ‘Lovin on Me’ hi kar khat chhungin stream maktaduai 27.4 leh download 6,000 a tling a, radio airplay-ah pawh ngaithlatu maktaduai 74 a nei thei a, hei hi chart-ah a No.1 pui leh ta a ni.
Taylor Swift hla hit, chert No.1 pawh lo ni tawh ‘Cruel Summer’ chu No.3 atangin No.2 a kai thar leh ta a, Tate McRae ‘Greedy’ pawh No.4 atangin No.3 a kai thar ve leh ta bawk.
Teddy Swims ‘Lose Control’ chu stream maktaduai 18.6 leh radio airplay maktaduai 30.7 tlingin No.8 atangin No.4-ah a invawrh a, Teddy Swims tan Hot 100 chart top 5-a a lan vawi khatna a ni.
Chart No.1 hlui Zach Bryan ‘I Remember Everything’ featuring Macey Musgraves chu No.6 atangin No.5 a kai thar leh a, kar kalta chart No.1 Ariana Grande “Yes, And?” chu No.6-ah a tawlh ve thung.
Doja Cat ‘Agora Hills’ chu No.11 atangin No.7 a kai thar leh a, a hla dang, chart No.1 pawh lo ni tawh ‘Paint the Town Red’ chu No.7 atangin No.8-ah a tawlh ve thung. SZA ‘Snooze’ chu No.8-ah bawk la awmin, 21 Savage ‘Redrum’ chu No.5 atangin No.10-ah a tawlh ve ta bawk.