Japan economy tlahniam recession ah lut

Japan chu a economy a zawna quarter hnih a tlakhniam hnuah beisei loh takin recession-ah a tawlhlut.
Japan gross domestic product (GDP) chu beisei aia nasa daihin kum 2023 nena khaikhinin 0.4% in a tawm tê a ni. Quarter hmasaah 3.3% in a tawm tê tawh bawk a.
Japan Cabinet Office thuchhuah ang chuan khawvela economy lian ber pathumna a nihna chu Germany lakah a hloh thei dawn bawk a.
Economists te chuan Japan GDP chu nikum fourth quarter aia 1% a thang zawk tura an ngaih a ni a. Mahse, Japan economy chu la siamthat theiha ngaih a ni thung a. Mahse, a zawna quarter hnih economy tlahniam chu recession a tawlhluhna anga ngaih a ni.
Nikum October thla khan International Monetary Fund (IMF) te chuan US dollar a teh a nih chuan Germany chuan Japan chu khawvela economy lian ber pathumna nihna a chhuhsak dawn an lo ti lawk tawh a.
IMF te chuan ranking an siam te chu economic growh final figure tarlan a nih hma chuan official in an puang ngai lo thung a. IMF te hian kum 1980 atang khan ram hrang hrang economy te tehna a tichhuak tan tawh a ni.
Economist Neil Newman chuan figure thar ber ang chuan Japan economy hlut lam chu $4.2 trillion a nih laiin Germany chu $4.4 trillion a ni tiin a sawi a. A chhan ber pawh Japanese currency chuan dollar lakah a hlutna hlohin mahse Yen chuan a hlutna a neihbelh theih chuan economy lian ber pathumna chu a hauh zui thei ang a ti bawk.
Tun thlaa Tokyo a press conference a neihnaah IMF deputy head Gita Gopinath pawhin ranking a Japan tlakhniam theihna chhan chu dollar laka Yen in 9% laia hlutna a hloh vang a ni a lo ti tawh bawk.
Mahse, Yen hlutna tlahniam chuan Japan company lian ber ber te share price titha zawkin Japan-in ram danga a thawnchhuah tam tak car ang te chu overseas market-ah tlawm zawkin hralh a nih theih phah thung.
Tunkarah Tokyo main stock index Nikkei 225 chuan kum 1990 hnua atum khat nan 38,000 mark a pel a, Nikkei 225 record high 38,915.87 chu 29 December 1989 khan siam a ni.
GDP data hnuhnung ber avang hian Japan central bank-in borrowing cost tihsan a tum chu a tikhawtlai thei bawk a. Bank of Japan chuan kum 2016 daih tawh khan investment tihsan nan negative interest rate a lo kalpui tawh a ni. Negative rate chuan global investor te ah yen chu a tihlu lo va, chu chuan currency value a tihniam a ni.
Japan economy hi tun hnai kum sawm thum chhung velin nasa takin a thang lo hrim hrim a. Chumai bakah khawvela kum upa tamna niin naupiang tlemna a nih bawk si avangin harsatna nasa zawk tawk thei a ni a, ram dang mi hnathawk tur a chawlut nasa bawk.