Japan-in pawngsual hremna dan siam tha

Japan chuan pawngsual chungchang ennawnin a siam tha a, hei hi an rama sex crime law kaihhnawiha dan siam thar hlak kalpuina a ni zui bawk a.
Pawngsual tih pawh sawifiahna thar neiin a hmaa ‘tihluihnaa inpawl’ tih chu ‘remtih dunna tel lova inpawl’ tia thlak niin ram dangte dan nena inmila kalpui a ni a.
Mipat hmeichhiatna hmang thei chin pawh kum 13 tih thin chu kum 16 ah tihsan a ni bawk a. A hmaa Japan dan neih te chuan mipat hmeichhiatna hmang tura intihluihna emaw thlemna te chu dan pawnah a hnawl lo a ni.
Hei mai bakah hian mipat hmeichhiatna chungchangah court thultukna in ang lo nuai a awm fo avangin thlak danglam tura nawrna a nasa em em bawk a.
Tuna dan thar hi Diet-Japan parliament chuan Zirtawp khan pawm felin mipat hmeichhiatna hman chungchangah tihluihna lam awm thei lakah dan khauh zawkin kalpui a ni dawn ta a.
Dan siam thar zingah mipat hmeichhiatna hman dawna a tuartu zu emaw damdawi hmanga hrai ruih ang te, tharum emaw vauna emaw hmanga dan chep ang te a khap bawk a. Chu mai ni lovin a tuartuin nakin zela atana pawi thei anga a ngaihna avanga a hnial ngamlohna thleng thei ang lakah te a veng tawh dawn a ni.
Tun hi kum 1907 hnu lama Japan-in hetiang lama dan a neih a siamthat hmasak ber a ni chauh a ni. A hma zawng chuan Japan chu mipat hmeichhiatna hmanna lama zalen ber pawl niin mahse miin kum 13 atanga 15 inkar nena mipat hmeichhiatna a hman chuan a hmanpuitu chu a hmanpuia aia kum nga emaw a aia upa emaw a nih chuan hrem theih a ni chauh a ni.
Hei mai bakah hian pawngsual nia inhria tena thuneitute an hrilh hriat theih hun chu pawngsual an nih atanga kum 10 tih chu kum 15 ah tihsan niin hei hi a tuartu te tana hun tam zawk peka sawi thei tura puahchah an nih theihna tur a ni bawk.
Hei bakah hian ‘photo voyeurism’ tih mai a ruka hmeichhiate thla laksak ang te chu dan pawna hnawl a ni bawk a.
Tuna Japan-in dan a siam thatna chhan ber hi kum 2019-a pawngsualtua puh court-in a chhuah zalenin a hrin a ni a, chu chuan ram pum huapin Flower Demo campaign kalpui a nih phah a. April 2019 atang han April 11 a piangin Japan ram pumah mipat hmeichhiatna lama hleilenna tuartute lainatna lantirin a awm zui ta ziah a ni.
A hma zawng chuan mipat hmeichhiatna lama hleilenna tuartute chuan an sawi chhuah chuan tia vauna tawk zawk thinin online comment lamah pawh a tuartute zawk chuan diriam an hlawh thin a, hei vang hian a tuartute chuan hrehawm ti takin ngawih an chuh ta zawk thin tia sawi a ni.
Japan-ah hian sexual victim ten ensan emaw enhran leh diriam an hlauhna avangin an sawichhuak zen zen lo tia sawi a ni a. A tlangpuiin zahthlaka lak a nih avangin ngawih an chuh phah zawk thin tia sawi a ni.
“Mipat hmeichhiatna lam hawia tharumthawhna ang te tihrem a nih theih nan ram pum huapa zirna kalpui ngai a ni a, vantlang nunah kan tuh a ngai a ni” tiin Kazuko Ito, vice-president of the Tokyo-based Human Rights Now chuan a sawi.