J&K thingtlang khuaah mak takin mi 35 damlo, tui sample la
Jammu & Kashmir-a Rajouri district-ah mi 35 chu mak taka damlovin damdawi inah dah luh an ni a, health department-in an tui tlan mek chu endik turin a sample an la a, heng laia mite tui lakna chu an khar rih bawk.
He district-a Badhaal khuaah December 7, 2024 leh kumin January 19 inkar khan damlohna mak tak avangin chhungkaw pathuma mi 17 an lo thi tawh bawk.
“Kotliparran khuaa cheng mi 35 chu tun hnaiah a chhan hriat chiah loh natna avangin damdawi inah dah an ni a, an dinhmun a hlauhawm lem loh hlawm a. An zinga pali erawh Government Medical College (GMC), Rajouri-ah enkawl zui tura thawn an ni,” tiin he khuaa medical team tirh hruaitu doctor-in a sawi.
Health department tirh team hian tui sample an la a, endik turin an thawn mek tih a sawi.
Damlote hi tui atanga natna kai theih kaite nat dan ang deuhvin an na a, hei hi damdawi thiamte ngaihven chhan pawh a ni a. Chhui hna thawh mek chauh a la ni a, a chhan tak erawh engmah an la hre lo tih sawiin health department thuneitute chuan tui thianghlim lo in vangah an puh rih.
“GMC, Rajouri atanga kal team-in tui tuichhunchhuah pathuma tui sample an la a. District thuneituten endikna result a chhuah hma chu heng tui laknate hi an khar rih bawk,” a ti.
“An damdawi ina medicine department atanga kan hriat dan chuan acute gastroenteritis a ni thei a. An pum a na a, an khua a sik a, tui an tlachham a, an khua a tha lo bawk,” a ti.
Badhaal khuaa thil thlengah khan nikum Devember leh January inkar, ni 50 chhungin naupang 13 leh puitling pali chu damlohna danglam tak avangin an thi.
Thuneitute chuan khaw pum chu containment zone-ah puangin a chengte chu quarantine centre-ah an dah a, thla khat chuang an dah hran hnuah an hawtir leh chauh a ni.
J&K thingtlang khuaah mak takin mi 35 damlo, tui sample la
Get real time updates directly on you device, subscribe now.