Joe Biden-a’n Israel tlawh dawn

United States President Joe Biden chuan Nilaini hian Israel a tlawh dawn a, chu chu Israel-in indona a kalpui mek laia a thlawpna lantirna nia ngaih niin Hamas tena indona helai region pel thlenga hlet an neihtir loh nana hmalakna ni pakhata ngaih a ni bawk.
Biden zin tur thu hi Secretary of State Antony Blinken chuan a puang a, Biden chuan ‘Israel tana hun khirhkhan leh helai region leh khawvel huap tan pawha hun khihrkhan’ lai takin a tlawh ang tiin a sawi.
Blinken hian Tel Aviv lo tlawhin President Joe Biden chuan Israel chu a thlawp bur dawn tiin a sawi a. Biden leh Israel Prime Minister Benjamin Netanyahu te chu an inhmu ang a ti bawk.
Blinken leh Netanyahu war cabinet te chuan darkar sarih zet inbiakna an neih hnuah Biden-an Israel a tlawh tur hi tihchian a ni chauh a.
Zin tur thu puanchianna neihah Blinken chuan president Biden chuan chiang takin ‘Israel chuan Hamas leh firfiak dang te laka a mi leh sa te humhim turin dikna a nei a ni’ tia a sawi thu a sawi bawk.
Biden chu Israel-in indona thleng meka a ruahmanante a ngaithla dawn bawk a, ‘civilian tena an tawrh loh theih dan ang bera thil kalpui a nih dan’ te a ngaithla ang tiin a sawi lang bawk.
Hetih lai hian Gaza Strip-ah chuan dinhmun a chhe hle tawh a, mi maktaduai chuang chenna mumal nei lova awm tawhin khawvela mihring cheng bitna ber pawl hian ei leh bar, tui thianghlim leh fuel supply te a tlachham hle tawh a. Washington chuan Gaza chhungah hian Americans tangkhang 500 a\anga 600 vel an la awm tiin a sawi bawk a.
“Gaza-ah hian a rang thei ang bera \anpuina a luh a ngai a ni,” tiin Blinken chuan a sawi a. Civilians tena \anpuina an dawn vat theih nan US leh Israel chuan hmalak dun an remti a ni tiin a sawi bawk a.
Hei bakah hian Biden chuan Hamas tena mi an hren te chhanchhuah an nih theih nan hma a la ang, a ti bawk.