Jordan-in Muslim Brotherhood a ban

Jordan-in Muslim Brotherhood a ban
Jordan-a sorkar chuan an pawlte kut atanga beihna thlen tum nia hriata rocket leh drone an man hnuah Muslim Brotherhood chu an ban.
Interior Minister Mazen al-Faraya chuan Nilaini khan thuthar lakhawmtute hnenah dan pela an chet avangin Brotherhood pisate chu khar vek a nih tur thu leh an bungruate pawh khawih chet phal a ni danw lo tih a sawi.
Brotherhood hian engmah an la sawi lo va, beihna thlen tum anga sawina erawh an pha tawh thung.
An awm an phalsak lo a nih chuan politics an khelhna pawl, Islamic Action Front (IAF) chu engtin nge an awm zui dawn tih hriat a ni lo va, tunah hian parliament-ah eptu member ngah ber an ni mek a. An hmunpui erawh Faraya-a’n ban an ni tih a puan hnuah police-in an dap tawh.
IAF Secretary General Wael Saqqa chuan an ni chu political party hran niin ‘pawl dang nen inzawmna an nei lo’ tih a sawi.
“Keini chu danpui hnuaiah thupek, dan leh phal chin ang zela khawsa kan ni,” a ti.
Kum 2020 khan Jordan-a court sorkar chuan Brotherhood hi dan anga an din theihna tur an tlin loh avangin ‘thiah’ turin a lo ti tawh.
Hemi hnu lamah pawh politics leh thil dangah an la tel zel a, IAF pawh nikum parliament inthlanah chuhin seat 138 awm zinga 31 an la.
Kar hmasa khan Jordan-a General Intelligence Department chuan an ram beih tum nia an hriat mi 16 an man.
Puak thei leh ralthuam, rocket, kah chhuah mai theiha duan rocket, drone an kawl a. Jordan leh ram pawna training niin an hre bawk.
Thuneitute chuan ralthuam leh puak theite hi Jordanian khawpui hrang hrangah phur kualin mihring chenna laiah an chhek niin an sawi a. Rocket siamna hmun pawh an hai chhuak zui bawk.
Faraya-a chuan Brotherhood member-te hian an hmunpuiah an pawl an tel ve a ni tih lan theihna a awm loh nan lehkha pawimawh pawh tihchhiat an tum niin a sawi.
An pawl erawh chuan inrawlhna leh hriat an nei lo tih an sawi a, ‘muanna a awm theihna tur’ chu an duh ber tih an sawi.
Brotherhood hi kum 100 dawn kal tawhah khan Egypt-ah din a ni a, khawvel hmun hrang hrangah branch an nei a. An tum ber pakhat chu Islamic dan, Sharia an tih hmanga rorelna ram din a ni.
Egypt leh Arab ram tam takah dan pawnah dah an ni.