Joshua hmaah Dubois

Palian huanga boxer lar pahnih; Anthony Joshua leh Daniel Dubois te chuan inrinni zan hian IBF IBF world heavyweight kawnghren an inchuh dawn a. British heavyweight boxer pahnihte hian inhnek hmuhnawm tak an lantir ngei tura ngaih a ni.
Palian huangah kawnghren pali kawl khawm thei hmasa ber Oleksandr Usyk chuan IBF Belt chuhpui tu tur Daniel Dubois hmachhawn aiin Tyson Fury hmachhawn nawn leh a thlang. Tyson Fury hmachhawn nawn leh a thlan zawk vangin IFB kawnghren chhuhsak a ni a, kawnghren pali a kawl kawp rei lo viau. Usyk kalsan kawnghren hi palian huanga champion hlui Anthony Joshua leh IBF Belt lo kal laiawktu Daniel Dubois ten an inchuh zui dawn ta a ni.
British boxer pahnih; Anthony Joshua leh Daniel Dubois te hi England-a khelmual ropui Wembley Stadium-ah an inhmachhawn dawn a a, a hmunah entu mipui 96,000 an pung khawm tura ngaih a ni a. Hei hi boxing a hmuna entu tam ber record thar a ni thei dawn.A hmuna boxing entu tam ber chu Tyson Fury leh Dilian Whyte te inhnek a n a, Wembley Stadium-a an inhnek hi mi 94,000 laiin an en. Anthony Joshua leh Dubois te inhnek enna tur ticket an hralh tawh hi ticket 96,000 zet a ni a. Fury leh Whyte te inhnek aiin entu mi sang hnih laiin an tam zawk dwn tihna a ni.
Olympic champion ni tawh leh palian huangah WBA, IBF leh WBA champion lo ni tawh Joshua chuan palian champion nih nawn leh ngei a tum thu a sawi a. A khingpui Dubois hnehin, champion nih ngei a tumruh hle. British boxer tha Joshua hian Mexican boxer huaisen Andy Ruiz Jr lakah a kawnghren kawl lai pathum a hloh hnuin a la let leh a. Ukranian Boxer tha zet mai Oleksandr Usyk lakah a hloh zui leh. Usyk nen hian inhnek nawn leh mah se a kawnghren hloh tawh a la let thei lo. Usyk a hneh loh hnuin vawi hnih a chak leh tawh a, kawnghren chuh thei khawpin a dinhmun a siamtha. Dubois hnehna a champion nawn leh a ni chuan British boxer tha ber anga ngaih Tyson Fury nen inhnek theihna hun remchang an nei tura ngaih a ni.
Palian huanga boxer lar tak Anthony Joshua hian professional huangah inhnek vawi 31 a hmachhawn tawh a, vawi 28 chakin a khingpui mi 25 lai a knock out. A khingpuite lakah vawi thum a tlawm tawh bawk. Dubois a hneh a nih chuan palian huangah a hming a chher thar leh ang a. Dubois lakah a tlawm a nih erawh chuan a thawm daiin, a chuai zui tura ngaihna lian tak a awm.
Joshua lakah fiahna hautak hmachhawn tur kum 27 mi Deniel Dubois hian inhnek vawi 23 a hmachhawn tawh a, vawi 21 a chak. A khingpui mi 20 lai a knock-out a, vawi hnih tlawm zawkah a tang tawh. A khingpui tur Joshua lakah rin kai lo zawk ni bawk mah se inlehthalna lian thlentir in, IBF kawnghren kawl ngei a tum dawn. British boxer pahnihte hi a inhlau lo tawn viau dawn a, inhnek hmuhnawm tak a nih ngei a rinawm.
Joshua leh Dubois te hi keini huna Pathianni zing lamah an inhnek tan dawn a, Zan dar 11:00 atangin show tan a ni ang. Pathianni zing hi boxing ngainatute tan thawh hma zing ni ngei dawn.