July chhunga kawng siamthat zawhloh chuan NHIDCL office kalh tum

Khamrang kawng chu July thla chhunga lirthei kalh theiha an siam loh chuan Aizawla NHIDCL office kalh thlenga bawhzui an tum tih Mizo Zirlai Pawl chuan an sawi a. Lirtheia eizawngtu pawl hrang hrang 10 pawhin July chhunga siam a nih loh chuan an thiam dan angin hma an la dawn tih an sawi ve bawk.

MZP Gen. Hqrs. president H Lalthianghlima chuan, MZP Federal Council vawi 59-na chuan - NHIDCL hnathawh a that tawk loh thin avangin, a that zawk theihnan MZP-in hma la rawh se, tia an rel angin, July 17 khan NHIDCL executive director Virendra Jakhar sawipui an tum a, chawlh a lo lak avangin an hmu thei lo tih a sawi.
Mizoram ei leh bar lakluhna kawngpui pawimawh, kal hleihtheih loh khawpa a chhiat lai a, NHIDCL hotupa berin August 7 thleng chawlh a la daih chu hriatthiam har an tih thu sawiin, “Mizorama awm tlaka kan ngaih loh bakah a deputation term a tawp tawh avangin pawhsei kan remti loa, Mizorama lo let leh tawh lo turin kan hriattir a ni,” a ti.
Helai kawngpui chhia, kal hleihtheih loh khawpa a chhiatna lai chu NHIDCL enkawl lai a ni tih a sawi a. Kumin March 26 khan Mizoram PWD chuan Bilkhawthlir - Kolasib (km 70-95) leh Kawnpui/ Khamrang (km 118-133) chu NHIDCL kutah a hlan tawh tih MZP president hian a sawi.
“Fur khaw chhiat vanglai taka NHIDCL executive director-in chawlh la a, lirthei khalhtute mangang authawm pawh engah mah ngai loa a ral thlir mai mai hian Mizoram mipui min hmusit hleah kan ngai a, July thla chhung ngeia NHIDCL-in an enkawl kawngpui chhe zual lai lirthei kal theiha thuam tha turin kan phut a ni,” a ti.
Hetihlai hian lirtheia eizawng pawl hrang 10 chuan thuchhuah intawm siamin, Kawnpui to Sairang inkar kawng, Sairang to Buichali (NH 306&06) leh Sairang to Langkaih (NH 108) kawng chu lirthei tan zawh hlauhawm khawpa a chhiat tawh avangin, July 23-30 inkara tlan theiha siam an phut tih an sawi a. Hemi hun chhunga an harsatna phuhru khawpa siam a nih loh chuan an thiam dan ang angin hma an la dawn tih an sawi a ni.