July thla khawlum ber ni ngei dawn

Khawlum zual zelah July thla chu khawvela record awm tawh china thla lum ber a ni ngei dawn tiin scientists te chuan an sawi.
July thla a lum em avangin researchers te chuan kum 2019 record chu khumin a awm ngei turah an ngai a ni.
UN chief Antonio Guterres chuan kan chenna lei chuan ‘era of boiling’ a lut mek tiin a sawi bawk a. Scientists te chuan khawlum zual zelna chhan chu fossil fuel hman nasat nena inzawm tiin an sawi.
US President Joe Biden chuan climate change chu ‘existential threat’ tiin a sawi a, tute mahin ‘climate change nghawng chu an pha thei tawh lo’ tiin a sawi bawk a.
Mithiamte chuan kum 120,000 chhunga July thla lum ber a ni dawn tiin an sawi bawk a ni.
Chutihrual chuan researchers te chuan July thla chuan thla lum ber record a siam chu mak an tih loh thu sawiin tun hnaia tehna hrang hrang an siamah khawvel chuan nasa taka lumna a tawh thu an sawi a.
Khawvela khawlum ber ni chu July 6 kha ni sa tawhin, khawlum ber ber ni 23 lai reocrd chu tun thlaa thleng vek a ni bawk tiin Copernicus Climate Change Service te chuan an sawi.
Kumin July thla ni 25 thleng a a lumna tur average temperature chu 16.950C ni turah an ngai a, chu chu July 2019 pumpui lumna 16.630C aiin a sang sa hrim hrim bawk.
Dr Karsten Haustein, University of Leipzig chuan July 2023 chu fossil fuel hman nasat hmaa July temperature record aiin 1.30C – 1.70C in a lum zawk ang tiin a sawi lawk a, a rin dan chuan 1.50C ni turah a chhut a. July thla chawhnu lam hmawr lam chu vawt deuh hret mahse July thla chu thla azawnga a lum ber a ni pha dawn tho tiin a sawi a.
“July thla lum ber a ni satliah mai dawn lo va, absolute global mean temperature ang pawhin a lum ber thla a ni ang” tiin thuchhuah a siamah a tarlang a.
“Tun anga kan planet dinhmun leh lumna ang hrefiah tur chuan kum sang tam tak kalta kha kan en let a ngai ang,” tiin a sawi bawk.
Researchers te hian thutlukna an siam nan hian global air temperature hrang hrang khawvel hmun hrang hranga weather station te atangin an lakhawm a.
Mahse khawvel huapa dik chata sawifiah thei tur chuan weather station tam tawk a awm loh avangin scientists te chuan atmosphere atang tea tehna an siam hrang hrang te chu computer model hmangin an chhut ta a ni.
He mi hmang hian scientists te chuan ‘map without gaps’ siamin chumi hmang chuan global temperature chu rintlak tak teh theihin a awm thei ta a ni.
Heng data te lakkhawm hmang hian scientists te chuan khawchin dik zawkin an hrilh lawk thei bawk a. July thla chu record awm chin ata a lum ber tum a nih dawn mai bakah kum sing chuang chhunga a lum ber thla a ni ngeiin an ring bawk.
Chung te sawifiah thei tur chuan scientists te chuan polar ice cores a air trapped te, deep ocean a sediments record te chu an hmang tel bawk a, hengte hian a hun laia climate te an sawifiah theia ngaih a ni.
Hengte hmang hian scientists te chuan tun July thla ang dinhmun chu kum 120,000 kal ta vel khan sea level pawh 8m aia tun hun aia a san laiin a thleng tawh a, khang hunah khan Hippos te pawh Britain hmar lama an la awm lai a ni, an ti bawk.
Researchers te chuan kan khawvelin lumna a neih belh nasatna chhan ber chu mihring tena fossil fuel kan hman nasat vang an ti a. “Kumin July thlaa extreme weather mi tam tak nghawngtu hi climate change nihna dik tak lanna leh hma lam hun khuhhawnna a ni” tiin World Meteorological Organization’s Secretary-General Prof Petteri Taalas chuan a sawi.
Hei bakah hian mithiamte chuan kumin July temperature chu temperature record khum tur hmahruai chauh tiin an sawi bawk a. Greenhouse gases nghawng kal zel te bakah El Nino weather system Pacific chhak lama ocean lum in atmosphere a lumna a pek chhuah natural event te chuan kum 2023 mai bakah kum 2024 temperature chu a tisang zual turah an ngai bawk a ni.
Hei bakah hian tun hnaiah atmosphere a Saharan dust a tlem hle bawk a. Heng airborne te hi ‘aerosols’ tia koh niin ni zung chakna vansang lama hlap lettu a ni a, aerosol tlem avang hian tun hnaia North Atlantic heat chu a thlen phah tiin scientists te chuan an ngai a ni.
Kum 2022 a Tonga a tuihnuaia tlangkang khan atmosphere-ah water vapour nasa tak pechhuak bawkin chu chuan kan planet tilum zualin carbon dioxide te a pechhuak hnem hle bawk.
Kum 2015 khan khawvel ram hrang hrang 200 dawn te chuan Paris climate agreement an ziak a. Hetah hian kan chenna lei global temperature chu 1.50C aia hnuaia dah ni se an ti a, chu chu pre-industrial elvel hmaa khawvel dinhmun ang niin fossil fuel te la hman nasat hma a ni.