“Ka hmangaih che” a tih sek loh avangin mipain a hmangaih lo che tihna a ni lo

“Ka hmangaih che” han intih deuh hnâp mai hi chuan thinlung a tinêm a, khawvel tharah min chhem lut delh delh mai thin. He tawngkam hian mi pahnih inkara inlaichinna awm chu eng chen a thuk nge a nih a tilang a satliah mai a ni lo va, thinlung chhungril a hmangaihna inphawrh chhuahna a ni. Hetihlai hian hmeichhia aiin mipa chu an âwm a khauh zawk ang bawkin an chhungril rilru puthmang pawh an puang chhuak nasa lo zawk thin, mipa chuan, “Ka hmangaih che,” tih thu hi i duh angin a sawi ngun lo pawh a ni maithei, chu chuan i ngaihtuahna a tibuai deuh a, min hmangaih ve tak tak lo a niang, tih te pawh i ngaihtuah thleng hial mai thei. Chutia rilru khingbai taka i awm lai chuan, heti zawng hian, a êng zawngin han thlir teh le- mipa chuan “Ka hmangaih che,” tih chu tawngkaa sawi kher lovin a chetziain a lo lantir reng a ni zawk lo maw. Tun tumah hian mipain hmeichhia a hmangaih tih a lantir dan, hmeichhe tana hriatthiam tur chi ni a relationship lama mithiam te sawi kan rawn tarlang e.
1. A thil tihsak thin che kha a tê ber thlengin ngaihtuah teh. Restaurant-ah in chawl dun a, eitur a lam a, hmarcha i ngam lo tih a hriat avanga waiter hnenah, “A thak loin aw,” a tih mai te pawh kha a hmangaih vang che a ni. Choka lama i buai deuhin pui tur che a a awm reng te pawh kha a hmangaih vang che a ni, chutiang i office lam hna i buai deuhah pawh pui tur chein a inpeih reng a, i kal lam thlawh leh haw tur hruai tu ber che a ni. Heng thil tê tham tak anga lang, kan en kân thin te hi “Ka hmangaih che,” tih a sawi fo lo a, a chetzia a lantir dan a ni zawk.
2. I himna tur a ngaihtuah pui thin che a, i hnathawk i haw tlai dawnin a rawn hruai loh che pawhin him taka in i thlen theih dan tur a ngaihtuah pui che a, i chetvelnaah te tawhsual tawh palh theihna laka i him theih dan tur a ngaihtuah thin. Chutiang chu hmangaihna a nih loh chuan eng nge ni ta ang?
3. Thil hrang hrangah a ringngam che a, a tana thil pawimawh tak ti tur pawhin nang aia rin zawk a nei lo. “I hmangaih chu i ringzo kher lo mai thei a, mahse, i mi rinzawh chu i hmangaih ngei ang,” an tih thin kha. Hei hi i hrethiam lo a ni mai thei a, mahse, miin min rinngamna nge min hmangaihna hi hlu zawk tih hi inhnial theih tak a ni ngei ang a, chuvangin min ringngamtu chuan min hmangaihna a tilang a ni.
4. A nunah a tel tir ve che a, a nuna thil thleng zawng zawng i hriatpui a, a chhan chu engkim a hrilh vang che a ni. Chanchin lawmawm lam a neih apiangin a hrilh hmasak ber i ni a, a nuna thil pawimawh thleng a awmin nang chu a ‘share’ hmasak ber i ni. Nitin “Ka hmangaih che,” tih a sawi kher lo a ni thei a, mahse, hetiang hian nitin a hmangaihna che hi a puang chhuak zawk a ni.
5. I nu emaw, i pa emaw kha engtik nge i hmangaih thu i hrilh hnuhnun ber? Han ngaihtuah teh le. Dik tak chuan kan mi hmangaih tak te hi kan hmangaih thu hi kan lo hrilh tam lo khawp mai. Chutiang chu mipa tam zawk pawh hi an ni- a hmangaih che a, chhungkua angin a enkawl che a. I laka a rilru put dan i hria tih a chiang a, chuvangin “ka hmangaih che” tih thu hi tawngka a sawi chhuah reng kher a ngai em ni?
6. A buai em em lai pawha i tana hun a pek thin dan i ngaihtuah ngai em? A bazar pui che a, i thiante thil tihnaah a kalpui che a. Heng te hi a thilpek che, i tana hlu tak a ni- a hmangaih che avangin i tan hun a insiam a, heng te hi “Ka hmangaih che,” tih a sawina a ni. Heng te hi i kawppui a nih avanga a tih ve tur rêngah ngai mai suh, a hmangaihna che a puanchuahna a ni zawk e.