Kaithar Parma laka tlawm Milan

Inrinni zan Serie A inkhel pakhatah top flight kawtkaia kirleh hlimhlawt Parma khelmualah 1-2-in AC Milan an chak lo a, tun hi 2011-12 season hnu lama Serie A tir lam match hmasa pahniha Rossoneri chak zawh loh ve ve tum khatna a ni.
He inkela goal hmasaber hi minute hnihna leka Dennis Man-a’n mualneitu team tana a chhuihluh niin, Emanuele Valeri siamsak a ni.
Man-a hian an league season bultanna inkhelah goal khung tawh bawkin, Milan laka a thun leh hnuah September 2011-a langsar Sebastian Giovinco hnu lama Parma player zinga Serie A season tir lam match hmasa pahniha goal khung ve ve leh thei hmasaber a ni.
Romanian Man hian season liamta khan Serie B lama Parma goal lut 17-ah inrawlhna neiin, chu’ng zinga goal 11 chu a hminga ziahluh a ni.
Second half tir lam minute 66-ah Christian Pulisic chuan Rafael Leao cross atangin Milan siphurh sut ve bawk mah se minute 10 a liam leh rualin Matteo Cancellieri chuan amah anga second-half substitute ve bawk Pontus Almqvist ball chhawpsak atangin Parma hmahruai nawnna goal a thawh a, AC Milan hian an goal chhuah hnuhnung zawk hi an sut zawh tak loh avangin kaithar mualah point an thawkchhuak zo lo.
League season bultanna inkhelah khan hun tawp dawna goal hnih khungin Torino lakah 2-2 draw an hlawhchhuak hram a, Inrinni zanah erawh point hmu zo lo zawngin an khawsa zui ta a, khelh hniha point khat chauh hum chungin Serie A standing-ah 16-na an luah!
Rossoneri hi Inrinni hma chiaha Parma nen an intum hnuhnung vawiriatah vawikhat mah an tlawm lo a, kum 10 chuang hnuah Parma chuan Milan an hneh ve ta nge nge a ni.
Milan ngam loh Parma hi season liamta khan Serie B champion niin, Italian top flight-ah an kirleh a, Inrinni zana San Siro club an hneh rual khan point li hum chungin table-ah hma an hruai hman ren rawn a, he thu buatsaih lai hi chuan hmahruaitu dinhmun hi an luah chhunzawm tawh lo tura ngaih a ni.
Parma tlarhnung inthlungkhawm tha lutuk kha an chakna thahrui nghet tak niin, tlarhma lamah Milan tan harsatna an siamsak reng bawk.
Goalkeeper Zion Suzuki khan first half tir lamah Milan tana Noah Okafor leh Strahinja Pavlovic-te goal tur a dansak a; halftime hnuaah Tijjani Reijnders chuan goal kham petperin, Suzuki chuan Pulisic-a goal tur a dansak leh bawk.
Hetih lai hian kartawp inkhel dangah defending champion Inter Milan chuan Lecce an hneh bik a; Internazionale chakna goal hmasa zawk hi minute ngana leka Matteo Darmian tauhluh niin, Hakan Calhanoglu chuan penalty atangin a chhuihlut ve bawk.
Ti hian, Simone Inzaghi team Inter hian a zawnin season ruk zet chhung chu Serie A home game hmasaberah hnehna an la chang chho zat zat a ni.