Zoremi Hmar Zote
-- Advertisement --
Nu leh pate hian kan fate chu lehkha kan zirtir tur chu a ni ngei mai. Mahse zirmi a ni em, a chem kalna a ni em tih hi ngaihtuah tel tur a ni. Nu leh pa tam tak chuan tul lovah kan fate hun kan khawh ralsak fo niin a lang e.
Mizote hi hmasang ata tawh infiamna ngaina hnam kan ni a, infiamna chi hrang pawh ngah tak kan ni. Kan infiam dan tlangpui erawh hun awl hnawh khah nan te, nuam kan tih vang te a ni ber a. Khawvel hriata inpho chhuah nan emaw, eizawnna atan phei chuan hmang kan awm lo tih theih a nih laiin kan lo changkang ve ta deuh a, football lamah hriat kan han hlawh ve tan a, India rama football club tha ber berah Mizo tlangval an zuang lut ve tan ta a, Mizoram chu football thiam state ti-a hriat lar hial kan lo ni ve ta. Football-ah chauh lo pawh, Boxing lam thlengin kan zuang lut thûk ve ta hle a, sawrkar leh sports association hrang hrang hmalakna leh thahnemngaihna vang a ni pakhat e.
Mizote hian a tlangpuiin kan fate hi sawrkar officer lian emaw, Doctor emaw, Engineer emaw nih tir hi kan tum sa deuh rùn hlawm a. A, hnam dangte pawh hi an ni ve vekin a rinawm. Kan fate chu lehkha zir nasa tura kan fuih dan pawh a inang deuh pútin a rinawm a, ni e, mi aiin an rethei bik ang tih kan hlauh vang te, mi aiin an hniam ang tih kan hlauh vang te-a lehkha zir nasa tura fuih kan ni thin. A dik reng mai, lehkha zir nasa se la, eng officer emaw ber ni se ti lo nu leh pa kan awm kher awm lo ve. Hei tak hi thenkhat tan chuan tha mah se, then khat tan chuan beidawnna zâkhua min thlentu a ni ve bawk.
Pathianin talent hrang hrang min pe a, a then chu zai thiamna te, a then chu thiam hnâng deh lama mi bik te. A then chu infiamna lam ti thei bik tur te leh thil hrang hrang thiam tura a hranpa theuha duan kan ni. Lehkha zir a tha e, eng line-ah pawh kal dawn se la lehkha thiam chu a tha ber mai. Mahse zirmi tur bik hi kan awm deuh ni chuan a lang. Lehkha zir tui thei lo, zir peih ngang lo khan football a lo thiam em em thei a, lehkha zirna kawnga tur luih theih loh, thiam thei reng reng lo khan sumdawn a lo thiam phian thei. Lehkha zir ringawt hi ei hmuhna a ni lo va, kan fa ten lehkha zir an tui ngang lo emaw, an thiam thei hlawl lo a nih chuan eng thilah nge an tui a, eng nge an buaipui peih tih leh, eng nge an chem kalna tih hriatsak a, chumi kawnga puih mai chu thil finthlak a ni.
Jeremy-a pa hian a fapa hi Doctor nihtir tum tlat ta se, a fapa tui zawng hi tuipui duh ta tlat lo mai se, tun dinhmun hi an thleng pafa lo tawp ang. Pa fing a ni a, a fapa chem kalna a hriatsak a, hlawhtling law law turin a pui tihna a ni mai a ni. Nu leh pa tam tak hi chuan kan fate tui zawng lam ngaihtuah sak map lovin kan fate lehkha zir turin kan nawr vak vak a, zirna kawnga chak lo chi, thiam thei em em lo tan phei chuan a hrehawm duh hian ka ring. Kan fate tuina, an talent hai chhuahsak tur zawk hian lehkha zir sàntir tumin kan pawngpaw nawr ta thin a, an lo thiam em em loh phei chuan keimahni bawk kan beidawng leh a; khua hi a var lo thin a ni e.
Hei, ka fapa pawh hi lehkha zir peih ngang lo, tui lo em em mai a ni a. Pawl sawm vawihnih a exam a, a inziak pass zo hlawl lo. Thla lak a thiam em em mai a, phone hmang ringawta a lak pawh a pui viau mai thin a. Photography lam a zir chak em tih kan han zawh chuan a lawm lutuk a zuang lo chauh mai a, a han zir ta a le…thu dang hla dang a nei thei tawh lo, a titi tui ber chu thla lak leh a kaihhnawih a ni chho a, nitin deuhthaw thla lak tur zawngin a chhuak peih a, a inzir nasa hle. Camera tha ve pangngai tak pahnih kan leisak a, kotu a nei ve tan chho ta a, tunah chuan ‘kum 20 mi lek intodelh’ a lo ni ta reng mai; lehkha kha lo zir luihtir tlat ta ila, amah chauh ni lo, keini pawh kan inhrem tel ang a, hun tha tam tak a liam thlâwn bawk dawn tihna a ni.
I fanu/fapa kha Doctor tur ni lovin, sumdawngmi hlawhtling tak tur a lo ni daih thei a, sport lama a tui viau phei chuan kan ram leh hnam tihmingtha thei khawpin a thleng sång ve lovang tih tuin nge sawi thei! Lehkha zir hi ka sawiselin ka dah hniam lam a ni lo va, zir mi ngang lo hi kan awm ve tih hi ka sawi duh tak zawka chu a ni. Lehkha thiam thei leh zir taima, eng emaw nih tum ruh tlat fa kan nei a nih chuan a lawmawm em em a, chutiang ni lo zir peih lo, thiam thei bawk si lo fa kan lo nei hlauh a nih chuan an tui zawng ngaihvensak thuai a finthlakin a rinawm. Nu leh pa hian kan fate hi kan hriat chian a pawimawh, keimahni duhna lam lama kawh kawi a, thên kualtir vak vak ai chuan, a chem kalna hriatsak a, chumi kawnga hlawhtling ngei tura fuih a, puih chu a bata kan bat a ni e.