Kan fate luhtirna tlakin sawrkar school siam ang – Education minister

School leh syllabus-te naupangte hip tur khawpa siamin, sawrkar school chu kan fate theuh luhtirna tlak khawpa siam tura tan lak a tul tih School Education minister Dr Vanlalthlana chuan a sawi.
State Council of Educational Research and Training (SCERT) bultumin zirlaite puitu tur – Thiamna Thûl (Jaduui Pitara) chu Thawhlehni khan School Education minister hian a tlangzarh a. India hmarchhak state zinga hmang hmasa ber a ni.
Minister chuan thingtlang kilkhawr thlengin naupangten an zirlai theuh a bulthut atanga tha taka an man theihnan tan lak a tul tih sawiin, sawrkar school chu fate luhtir theihna khawpa siam tura tan lak a tul tih a sawi. School leh syllabus pawh naupangte hip theia siam a ngai, tiin, MLA-te chu an bial theuhah school enkawl bik nei theuh tura ngen a tum tih a sawi a ni.
SCERT joint director Lalduhawmi Thomte sawi danin, National Curriculum Framework duhdan angin naupang tan zirna chu infiamna behchhana siam tum a ni a, chumi atan chuan he thil hi ruahman a ni. Thiamna thûlah hian naupangten kuta an khawih leh hman theih, hmuhnawm ti paha an zir theih item 30 dah a ni a. Naupangten kum 3-8 chhunga an zir hi an nunah a bei nghet a ni tih zirchianna atanga hriat a ni a; hemi behchhan hian he thula hmanrua chi hrang hrang dah hi naupangten zirna bulthut an thiamna atan ruahman a ni.