Kan hlauh tur chu BJP niloin ruihhlo leh smuggling-te a ni – Dr K Beichhua

Mizoram mipuiin hlauh tur dik kan hriat a ngai a, hmasawnna thlentu tur BJP inhlauh siak aiin kan thalaite suattu ruihhlo leh sum awlsam hmuhna smuggling te a ni tih BJP MLA Dr K Beichhua chuan a sawi.
Zirtawpnia BJP State office-a inkhawmah BJP State Core Group member ni bawk Dr K Beichhua chuan India ram chu mipui tamna ber ni mek mah se, China ai pawhin GDP than danah a sang zawk hle tawh tih a sawi a. Belh tlak leh tlukluhna tur Prime minister Modi kan nei chu Mizoramin hai bik loang u, tiin a sawi.
Mizoram chu sum dinhmunah a dinhmun a tha lo hle tih sawiin, tun sawrkar kumah ringawt pawh kan bat zat tur hriat theih a la ni mai lo tih sawiin, “Chhanchhuah ngai dinhmunah kan awm. Kan rilrua chapona dahtha a, tlawmna nun nen Narendra Modi nghenchhan hi kan din khawchhuahna tur a ni tih kan ram dinhmun ngaihtuah tam apiang chuan a formula awmchhun a ni tih an hriat a rinawm,” a ti.
Hlauh tur dik hlau loa, hlauh loh tur kan hlau leh si chu vanduaithlak a tih thu Dr K Beichhua chuan sawiin, “Ruihhlo vanga thalai tam tak thihna leh smuggling-te hi kan hlauh tur a ni. Hlauh loh tur kan hlauh vanga kan ram dihmun chhe tak mai khaichhuah mamawh tak hi engtin nge kan khaichhuah ang? BJP hi hlaulo ang u,” a ti.
Mizoramah job card ringa chhungkaw chawm mi tam tak an awm tih a sawi a. “An dinhmun a hniam kan ti viau maithei, amaherawhchu hetiang chiah hi sawrkar laipui laka Mizoram dinhmun a ni mek. Chuvangin mipui, miretheiten leirem kan rah ve theihna tur chuan miretheite ngaihsaktu Prime minister puihna hi kan mamawh a, a kalkawng turin BJP Mizoram hi a pawimawh thung,” a ti.