Kan mamawh ‘hockey khelmual tha’
…theipui kungah Olive thei a rah thei em ni ? Grep hruiah theipui a rah thei em ni?” tih ziak ang khan coach tha ber tan pawh khawmualah ringawt chuan swimmer tha tak zirtir chhuah theih a ni lo a, chutiang bawkin khelmual tha lo atang chuan player tha tak chherchhuah chu thil harsa tak a ni ngei ang.
Hockey game-ah ngat phei hi chuan football, basketball leh volleyball-te aia a ball a tet bik avang leh a game pumpui hi lei hrula khelh deuh vek a nih avangin khelmual tha a mamawhna a sang lehzual lo thei lo a ni.
Tunlai khawvelah chuan hockey game hi Olympic leh tournament lian zawng zawngah hian khelmual tha astroturf ground/pitch-a khelh a ni vek tawh avangin chutiang ang intihsiakna ropui leh liana lang pha ve tur chuan a hmasa berin astroturf ground-a khel ve thin mai pawh ni lo, chu’ng hmun atanga inzirchhuak nih chu a ngai tlat a ni.
Khelmual tha pawimawhzia chu Indian hockey chanchin atang pawh hian a lang chiang khawp mai.
Kum tamtak chhung hockey khawvela ro lo rel thintu, kum 1928 atanga 1972 chhunga Olympic gold medal pasarih, silver pakhat leh bronze medal pahnih lai la thei, 1975 Hockey World Cup-a champion bawk, India chu 1976 Olympic- ah meuh chuan pasarihna a ni pha hram a nih kha!
Tin, 1976 kum atang chiah khan India chuan hockey game-a a ropui bikna leh a chungnun bikna chu a hloh tan ta a ni kan ti thei bawk ang.
Hei hi a chhan ber chu kum 1976 hma lam zawng kha chuan Olympic leh tournàment lian dang reng rengte kha India player-te khelh thanna leh an hman thiam zawng tak, ground pawh an duhkhawp an neihna, natural grass chunga khelh thin a ni a, amaherawhchu, 1976 Olympic-a astroturf ground hman a nih chiah khan chutiang ang ground tha chu India khan lo inzirlawkna tur pakhat te mah a la neih ve loh avangin astroturf ground-a lo khel thang tawh Europe team thate chu an tan hneh rual an ni ta lo a ni.
Chutiang ang khelmual tha a neih ve hleih theih loh chhung chuan Australia leh Europe ramte’n nasa takin an lehpel zo ta a ni.
Kum 1980 hnu lama astroturf ground a neih ve hnuin zawi zawiin hma a sawn chho ve leh a; mahse, a hnuaia awm thinte leh a elpui thinte um pha ve leh tur chuan kum 40 teh meuh a hman a lo ngai ta a nih hi!
Mizoram pawh hi han thlir ta ila. Tunhma zawng kha chuan Mizo zinga hmeichhe NIS coach hmasa ber Miss Lalrampari (Miss Pari) khan kan tleirawlte kha a theihna leh thiamna zawng zawng hmangin han hrual teh thin mah se phai lam tournament lianah meuh chuan vai ngal ria te te khan si 20 chuang chuangte an lo phurh leh mai thin a nih kha!
Khatih lai khan kan naute khan hockey game kha an tih mi loh hrim hrim avang leh vaiho kha hockey game thiamsa renga piang an nih bik vang a ni hauh lo. A chhan bulpui ber chu khatih hun lai khan Mizoramah hian hockey khelmual pakhat mah kan la neih ve loh vang a ni zawk.
Khawi lai veng football ground leh hmun zawl rualrem lo pui puite hawh chawpa inzir ve nawk nawk kan naute tan chuan an naupan tet ata khelmual tha atanga lo inzir chho char char vai nula leh tleirawlte chu an inzirna tualah leh an hman thiam ground-ah chuan han khin phak ngaihna a awm thlawt lo a ni ber.
Chu chu hriain coach huaisen leh tumruh Miss Pari chuan Mizoramin hockey ground kan neih ve theihna turin a theihna zawng zawng hmangin tan a la ta a; khatih laia sports minister Pu ZH Ropuia hmaah ngei chuan, “Hockey hian training centre leh khelmual hran kan neih atanga kum thum chhunga national player ka chherchhuak lo a nih chuan min ban dawn a nia,” ti khawpin thuneitute a nawr ta!
Chutia a ei zawnna ber leh a tuina ber pawh dahkham thak ngam khawpa a inpekna leh a thahnemngaihna chu kan ram hruaitute leh thuneitute chuan kut kuangkuahin an lo thlir mai mai thei bik ta lo.
Khatih laia sports director taima leh viak tha Pu Zoliana Royte khan theihtawp a chhuahna zarah kum 2004-ah chuan Mizoram hockey chuan ama pual ngeiin Thenzawl hmunah khelmual a nei ve ta!!
Chu ground chu state dangte ground ngaihtuah chuan sitawm tak leh bawngtuthlawha thlawh mam chawp mai mai mah ni se Mizo naupang, Pathianin hockey game-a talent tha tak a pekte leh an coach-te tan chuan malsawmna thlentu a va ni chiang em!!
Anmahni puala khelmual an neih kum la la chuan kum danga si 20 chuang chuanga an hneh loh thinte kha an zuk hnehtawkpui (draw) nghal a, a kum leh 2005-ah phei chuan India ram pum tournament lian leh ropui Nehru Hockey Tournament-ah final hial an thleng ta!!
Tin, kum 2006 a lo inherchhuah meuh chuan Miss Pari chuan a intiamna chu tihlawhtlingin India national team-ah Mizo tleirawl pahnih an tling ta der mai a nih kha!
Hun a lo kal zel a, kum 2015-ah chuan Thenzawl hockey ground chu state dangte khelmual anga cheibawl (astro turf phah) a lo ni ve ta a, chu khelmual tha pakhat te mai chuan national player engngemawzat bakah Mizorama eng khelmual mahin an la hrin ve theih ngai reng reng loh leh an la hrin lawk loh tur Olympian meuh a hringchhuak ta rup mai a nih hi!
Amaherawhchu, hetiang a nih mek laia kan hriatreng tur chu – hockey ram ropui India rama kan elpui, keini aia khelmual tha nei hmasa zawkte hian a tha dang an neih belh zel a, chumi hmang chuan player tha tam zawk an chherchhuah belh zel tih hi a ni.
Tunah hian Mizoram pumpuiah hian hockey khelmual hman theih hi a vaiin pahnih kan nei a, chu’ngte chu km 150 vel inkar dana awm an ni lehnghal.
He’ng khelmual pahnihte mai hi chu state dangte nena kan inelna leh India ram ropui tana international player kan inchherchhuah siakna kawngah hi chuan a tawk zo mawlh lo a ni.
Khelmual tha tam zawk chuan kheltu (player) tam zawk a hringchhuak ngei ang a, kheltu tam zawk atanga player tha zual thlanchhuahte chu player tlemte zing atanga thlanchhuahte ai chuan an tha lehzual ngei ang.
Chutianga player tha zawk leh tam zawk kan lo neih theih a, kan elpui state dangte laka kan dinchan zel theihna tur te, international player kan neih belh zel theihna tur leh kan sawrkar vision ropui tak, ‘Vision 2036 Olympics’ a lo hlawhtlin ngei theihna tur hian kan Aizawl khawpui – football, basketball, volleyball leh futsal game-te tana khelmual tha tamtak awmna hmunah ngei hian hockey khelmual tha pahnih khat tal neih ve hi a va tulin, a va pawimawh em!
– Apektei pa, Durtlang Mual Veng
Kan mamawh ‘hockey khelmual \ha’
Get real time updates directly on you device, subscribe now.
Next Post