KAN MAMAWH POLITICS DIK

H Lalchhuanliana

Kan rama politics kal dik loh thu hi kan sawi nasa hle mai a, a bul tan dan dik tawk lo kha kum 70 hnu thleng pawha kan la siam tha hleithei lo hi a veiawm hle mai. Mizo Union Party a lo din khan Kohhrana hruaitute pawh political party-ah an tel ve a, mahse UMFO party a lo din leh tak hnu khan Party pahnihte khan party politics an luhchilh nasat tak avang khan Kohhran hruaitute an ralbang ta a, chu chu politics dik lo (party bil politics) tobul chu a ni ber awm e. Chu politics dik loah chuan party bil an inhaivur a, mipui nawlpuiin an chanvo an chang lo va, party mite inkar thlengin inhuatna a thlen a, hmasawnna hnain a tuar a, Bible zirtirna anga rorelna dik a awm thei lo a ni .
Hun a lo kal zel a, mithiam pawh an lo pun tak zel hnu hian Politics awmzia hriatnaah pawh kan lo harh ta zel a. Kohhrana rawngbawl hna leh ram rorelna hna chu a kawng dang deuh mahse, rual khai taka kalpui tur a nih thute kan hre ta zel a ni. Kohhrana hruaitute pawhin Politics an luhchilh ve leh ta a, ram hruaitu pawimawh tak takte an lo ni ta zel a ni. Mizoram Synod phei chuan Politics dik leh tha a awm theihnan Political Education te buatsaihin Pathian thu atangin nasa takin hma a la a, a tangkai hle a ni.
POLITICS DIK CHU :- Pathian thu thiam (Theologian) ten Politics tih hi Grik tawng niin Grik ram khawpui inawpna leh roinrelna chung chang sawina a ni e an ti a. A awmzia chu a tawi zawnga sawi chuan, mihringte khawsak hona atana dan fel tak hnuaia ram rorelna kalpui tih a ni ber awm e. Chu chu Politics dik chu a ni a, Bible hian chhandamna thu bakah mihringte khawsak hona atana kan zawm tur, dan leh thupek hrang hrangte zau zawkin min kawhhmuh tel bawk a ni. Thuthlung hlui hun atangin Thuthlung thar hun thlengin ram rorelna leh khawtlang thatna lam (Politics) hi a sawi nasa em em a. Ram rorelna chu Pathian ta a nih thute, nun hona atana Isua zirtirna thute, ringtute chu roreltute zah thiam turte leh roreltute mawh phurhna thlengin kan hmu a ni. Heta tanga lang chiang ta chu, Bible hian ram inrebawlna lam(politics) hi a sawi hnem hle a, Kristian rama roreltute chuan chu chu an innghahna leh entawn tur a ni ang. Ram dan tha tak kan neih hi Bible zirtirna kalh awmin a lang lo va, bible zirtirna anga kalpuia kan thatpui tur vek zawk niin a lang. Kristiante tan chuan bible hi lehkhabu rintlak ber, dik lo thei lo kan tih a ni a, chuta innghat politiciante chu an kal sual ngai lo vang a, ram tana mi hmantlak tak an ni ngei ang. Kan Pathian thu thiam zing ami Rev.Prof.B.Lanunzira thu ziak, “Bible leh Politics” tih atang hian mithiamten Politics leh Pathian thu(bible) an sawi dan hi tlem i lo en teh ang.
1. Thu ziak tu lar tak Michel Walzera chuan “Bible hi sakhaw lehkhabu(religious book) a ni a, ram rorelna leh inrelbawlna chanchin ziahna bu (political book) a ni bawk” a lo ti hial a ni.
2. Wayne Grudema pawhin “Bible hian nun kawng tinreng kaihhruaina a zirtir a, ram rorelnate, vantlang nun siam thatnate a huam vek a ni” a lo ti bawk.
3. Kohhran pa John Calvina pawhin ram rorelna leh thlarau lam thil (spiritual kingdom) te chu rawng inbawlsak tawn turin a ngai a, Geneva khawpui siam that hna pawh kha Pathian thu hmangin a thawk a nih kha. John Calvina khan ram rorelnaa Pathian thu neihna hi a dah pawimawh hle a, sawrkar hi Pathian ruat leh mihringte leh thil siam dang zawng zawngte enkawl hna thawk tura ruat an nih thu hi a zirtirna pawh a ni. Leilung awp tura mihring duan hi John Calvina chuan politics a ni nghal a ni tiin a sawi bawk.
4. David Bauchama phei chuan “Bible hian Kristiante chu politicsa inrawlh turin a tur a, Kristian College, university leh Kohhrante hian politicsa inhmang turin zirtir hna a kalpui tur a ni” a lo ti hial a ni.
5. Thuthlung thar mithiam, N.T.Wrighta pawhin “Kohhran chuan thuneitu sawrkar lakah thutak hriattirin eptu pawl nihna a vuan tur a ni,”a lo ti hial a.Ram rorelna chu Pathian thu anga a kal loh chuan Kohhranin huaisen taka dodalin siam that hna a thawk tur a ni a ti nghe nghe a ni.
Kohhran-pa ti hiala koh John Calvina leh mithiam hrang hrangte thusawi tar lan tlemte atang ngawt pawh khian “Politics dik” chu Bible zirtirna mila ram mipuite enkawl hna a nih hi a chiang hle mai. Tuna kan rama politics kan kalpui dan erawh hi chu party bil politics, mipui huap zo lo,mahni inhaivurna, a tling leh phu zawk aia party mi leh sate duhsakna a la ni fo mai.Chu chu politics dik lo leh bible kalh tlat a ni si a, kan bansan vat loh chuan Pathian pawi kan sawi reng dawn a lo ni e. Politics dik zawk, Lal Isua zirtirna nen a inmil, eiruk leh hlemhletna tel lo, mipui huap zo, rethei zawkte lam hawi hian kan ram politics hi kalpui tawh ila,chu chu kan ram damna tur zawk a ni ngei bawk ang.Ram roreltu apiangte hian dikna leh rinawmna nen, bible zirtirna mila ram hruai hna an thawh phawt chuan malsawmna pawh kan dawng ngei ang.