Kan phun aia tam kan kit zel

Kum 1999 atanga hman thin Green Mizoram Day(GMD) chuan kan hma lawkah min hmuak mek a; kumin hi a kum 25-na tur a ni ta. (Covid-19 avangin kum hnih kan hmang lo). GMD kan hman chhunga thingtiak phun zat chu nuai 45 chuang a ni tawh; chutih laiin kum tin thing lian puitling sa nuai za tel tehmeuh kan kit reng thung.
Kum tin hetiang zat thingtiak kan phunte hi chu thingtlang loneihnaa kih thluk zinga tel ve lo tur an nih avangin, thufingin ‘something is better than nothing’ a lo tih ang deuh khan, thingphun hi a sawt em em a ni tih kan hriat tel a ngai. Chutih rualin, thingtiak kan phunna tur hmun erawh kan thlan fimkhur/uluk a pawimawh. Duhthusamah chuan, a mual tuam zawnga thing chi hnih khat a hlanga phun te hi ching chho ila, chu chu enkawl zui pawh a awlsamin, a lo thanlen hnuah a ram lan dan (scenery) mawina belhchhahtu a ni ang a, chu chu tourism promotion atan pawh thil tangkai tak a nih a rinawm.
Hetih lai hian, thingtiak phun enkawl zui kawngah kan phur zui tawh lo thin erawh inenfiah kan mamawh. Hriat theih chinah, kum 2013 atang khan thingtiak phun nung zui zat hi chhinchhiah tan a ni a. Kum 2013-a thingtiak phun 72,241 atangin 62% a nung a; 2014-ah 98,632 atangin 58%; 2015-ah 81,233 atangin 70.53%; 2016-ah 1,23,405 atangin 81.06%. Chawhrualin thingtiak phun nung zat hi 67% tihna a ni. Kum 2016 hnu lam record hi hriat zui a ni ta chiah lo.
A tir lam khan, thingtiak phunte enkawl zui that a nih loh avangin a zatve aia tam mah a thi thin niin a lang. Enkawl zui that leh that loh chu a hriat khawp mai; Falkawn referral hospital kawta minister leh kan sawrkar mi pawimawhte thingtiak phunte kha chuan hlim nuam tak a chhuah tawh laiin, a ruala phun ve tho kawngpui kam ami tam tak chu khup chen vel, a then chu a tawih ral etc. a ni thin.
Thingtiak phun hi a tha, a tha lutuk, i chawlhsan lo ang u, thingtiak phun i uar deuh deuh ang u. Chutih rual chuan, ramngaw tichereu zawnga ei kan zawnna hi kan bansan theihna tura tun aia chak zawka hma kan lak erawh a pawimawh hle a ni.