KAN RAMA TUI HARSATNA HI ENGTIN NGE NI TA ANG LE!

Ram thenkhat te chuan a ram mipuite chawm zo khawp tui thianghlim (fresh water) hi an ramah an nei zo lo. Chuti chung chuan ramdang atangtea chawlutin leh an ram tui te tithlianghlimin, a ram mipuite hnianghnar takin a chhawpchhuahsak thin.
Kan ram thlir ve leh ta i la: Kan ram erawh chu lui tui in tlak loh khawpa thianghlim lo hi a tam lo khawp ang. Kan lungten thenkhat pawh hi keimahni lamin kan lui tui te hmangaih nachang kan hriat loh avanga kan tih bawrhbàn te a awm. A ni! Nang leh kei hi Chunglam khian ramdang/hnamdang aiin tui chungchangah kher chuan min duhsak uchuak emaw tih tur a ni a. Ramdang khian Chunglam khi chhuahchhal pawh ni se a awm lo lo ve! Ram thenkhat, Factory leh Industry lian avanga an ruahtui balhzia te thlir la, kan ram ruahtui han thianghlimzia leh hlutzia te hi i hre nawn awn awn-in ka ring!
Mahse, chuti siin kan ram khawpui neih ve te, mahni in chhunga tui herhhaw laklawh tawh si-te hian tui kan va khawpkham/khamkhawp lo si em! Kan ram lui tui thianghlim tak tak, luang hum hum te hi eng chen nge chetsual nan ringawt kan hman dawn? Kan ram lui tui anga thianghlim hi asin Arab ram te’n an thlakhlelh ngawih ngawih! Engtikah nge kan lui tui thianghlimte hi hnianghnar taka mahni in chhungah kan hman ang a, khawlaiah te khualzin veivak leh a duh apiangte hman theih tura kan chik chhuah tir dawn? Heng ang ti tur hian Sap hming neih kher a ngai em ni? Nge, “Lee leh Min Won” tih vel sakhming chawi a ngai zawk? A chhanna chu: “A ngai lo; duhlian hmingpu chung hian Chung Pathian zarah kan nei thei; SORKAR dik awm se” tih hi a ni. Mipuite hian mawhphurhna chen nei mah ila midik lote inzawrhna kan la awih fo thin dan han hmuh hian mipuite hi hruai hrehawm leh kawhmawhbawl chi kan ni lo tih a a chiang. SORKAR |HA KAN MAMAWH A NI MAI!
ENG TIN NGE TUI HNIANGHNAR DÀN TUR CHU?
1) Luitui khuah:
A har lo; har lo tak a ni. Sawi tak ang khan Kawlphetha leh a ram mipuite chawm nan kan ram lui tui te hi a la tam tawk. Kan hman sen loh chu kan thenawm ramten an duh chuan kan hralh mai dawn a ni. An duh ngei bawk ang. Zâwng kàwi hmûam hmel zir niawm taka thil sawi puam tãlh tãlh-a, bawhzuina awm leh si lo hian awmzia a nei lo. Kan mumang kan sawi vel mai mai emaw ni chu aw ka ti. Kan mumang kan lo sawi a nih paw’n Josepha mumang ang tal kha lo ni se a tha tur!
Tin, Sorkar-in khawng leh hnehsawh taka kan rama luite veng tur hi kan lui lian leh thaah te hian duty tam zawk dah se la. Tibawrhbangtu chu an chungah hremna na tak lek leh bawk se la. Hei ai hian kan luitui te a thianghlimin, tui kâm zel tur pawn ziaawm lam a pan ngei ang.
2).Water Harvesting:
Tin, chhungkaw tin tana pawimawh tawpkhawk chu WATER HARVESTING SCHEME kalpui hi a ni. Sawi takin kan ram ruahtui te hi ala thianghlim tha a, dahkhawl tlak a ni. Ama’rawh chu, dahkhawl turin sum a lo ngai a; chu chu a siamna tur hmun neite pawna (k)an harsatna a ni. Engtin nge ni ta ang le! Mi’n,”Water Harvesting siamna tur hmun kan nei e,” an lo tihin, “Yes/OK,” tingawt lovin, Spot verification neih ni se. Chumi hnu-ah siamna tlaka ngaih a nih chuan Sorkarin han subsidise sela, heti lam kawngah tun ai hian mipuite min tithangharh ang a, tui thianghlim kan hnianghnar ka beiseiin, ka ring tlat a ni. Tin, a hna pawh a neitu turte kuta dah mai lovin, a bialtu Deptt hotute’n a rintlak ngei em tih te enzuiin, vil tlat bawk se la.
Heng ang hi sorkar-in a lo kalpui a nih paw’n a siamna tur ram nei lo chuan a siamna tur hmun neite han thik viau na tur awm pawhin ka hre lo.
Ka sawi ang thil lo thleng tur hian he Zoram hian fahrin manhla a nghak mêk a ni. Nghak chhuak zo tak maw!
SA A TLÀ, KAN RAM CHHANTU NGAIIN A RÛM!