KAN RûN KHA!

JC.Zoremi Hmar Joute

Hmanah chuan maw ami dungthul
chhungkim tein,
Runah hlim ten sih nau iangin kan nui za a;
Chiar nghin nghiana chhunni zan khua kan varna kha,
Tunah zawng maw run ram iangin a ngui zo ta.
Aw! Chhung kim lai ka ngai mang e!

A kawt zawl zau vak lo chu tualchaina atana hman nasat tih hriat tak hian a bel hlurh a. Marble khelhna tura chawh khuar te, invawm chhuah khelhna atana rin bial kalh te chu an langsar hle a, A sir velah chuan Rose, par khat em em mai leh derhken kung te, nuaithang leh chuailopar te chu inhlat angreng takin an ding ve far a. A phuntuin a phun tirha a uluk tluk zetin a ngaihsak leh tawh lo tih hriat tak mai hian an ro bi be hlawm a. Huana thingsemim par rim rawn nam thang leh hak thin chu a ngainatawm viau lo thin. Assam type in niin a neitupain thli a hlauh em avangin a ban a zingin a rinawm tlet tlawt hle a; cyclone a tleh hum hum lai pawh khan a nghing ve mai mai lo ta reng a. Chuti taka in nghet leh rinawm chu ni mah se thli a tleh hlek chuan pa ber chu a tlanchhe ngei ngei tho!
Chu inah chuan hlim taka nui ri te, vawk chaw chhum so barh barh ri te, naupang infiam hlim thawm leh naupang thuawih lo hrem ri te a thang le lu ve thin a. Chu inah chuan hlim ni lawm ni tah leh lungngaih kan tuar za a, thu tha tinreng fah kan dawnna, zo nun ze mawi atanga kan hma lam hun atana duhthu kan sam za-na thin a ni. Zing dar rukah chuan thawm a chhuah viau tawh thin a, dar kua velah chuan uluk taka kalh niin, a reh leh thiap tawh thin a. Tlai dar thumah sikul bang hmasa berin kan hawng leh mai thin. Zilhna leh fuihna, enkawlna kan dawn thin zingah tun thlenga rilrua ka la vawn a awm nual mai.
|henawmte nen intihthinrim loh hram hram tur. Veng dang leh khual khuaa kan chhungte aiin thenawmte hi an hlut zawk chang a awm thin a; a theih chen chen tlawm zawka tan tur.
Ruk ruk loh tur, Riltama kan thi takngial dawn a nih erawh chuan kan nunna atan engpawh kan ti tur a ni thung.
Khawlaia thil char loh tur. Eng pawh inrawn char chuan kan lo pawm ngai lovang a, in chharna hmunah in dah leh zel ang.
Aia upain an hauh cheuin, in thiamna ngei pawh ni se, hmai zangthalin in chhang tur a ni lo. Thudik a thamral ngai lo.
In thiante nen in inhauh chang te, in insual chang tein kan chhan ngai lo che u tih in hria. Kan hmangaih loh vang cheu emaw, kan khawngaih loh vang che u a ni lo; a chhan chu kum sawmhnih in nih hunah in hre mai ang. Kan chhan ngai dawn lo che u tih hi hre reng rawh u.
Tumah hau hmasa suh u, vawi hnih an hnek cheu thleng in dawh ang. A vawi thumnaah chuan dawh loh tur. In thiamna a nih ngat chuan a tul chuan thih chilh tur. Insualnaa in tah chuan ka hlap belhchhah zel ang che u. =ap chunga in chhung in rawn lut ka hmu tur a ni lo.
Hnatlan nikhua leh vantlang thil tih a awm reng rengin, zawmthaw pawla tan ai chuan kal loh law law a tha. Tlawmngaihna hi mizo thisena bet tlat a ni a, tlawmngaihna nei lo mihring an ding chhuak ngai lo.
Mitthi lumen leh thlan laih te, kan pang a dam phawt chuan kan hmaih tur a ni lo.
Vai ngaihzawn loh tur. (Min melh deuh bik thin)
Kum sawmpariat in nih thlengin kan thu in zawm ang, a bak chu in thu a ni.
Zu leh ruihhlo dangte, a that lohzia kan sawi fo a; in hre hlei hlui tawh. Ti ve chhin rawh u. Tih zui tlaka in ngai a nih chuan in thu. Eng nge a nih in hriat chak chuan a ruka ti lovin sawi ula, ka phalnain in ti ang. Eng nge a nih in hre ve tur a ni. Mipa ngat phei chuan tem chhin ngei ngei tur. (Hei hi a mak deuh mai thei a, mahse ka nau mipa pahnihte hian tih tlakah an ngai lo a ni mai thei; an him pial mai)
Chu inah chuan naupang enkawl dan khauh tak mai kenkawh a ni thin a. A khat tawkin ‘lehkhabu check hun’ an hmang thin a ni. Unau zinga a naupang ber ziak loh bu an han check chuan, a lo him pial avangin; hauh a ni ngai lova. An mi lai pawh chu phunglung viau mahse tawngkam tlem azawnga hauh bak tuar lovin a tlingtla thei thin. A upa ber, hmeichhe awm chhun ni bawk lehkhabu an check lai chuan amah mai ni lo, a nu thlengin an mangang viau thin mai. Duatin hmangaih hle mah se hauh loh theih loh, vuak loh theih loh hian a awm thin miau mai a, zilh leh vuaka sim theih chi ni se a aia naupang fel an awm lovang tih tur khawpa enkawlna dawng nasa a ni.
Mikado no. 5 an check mek lai chanve an thlen chuan a lu chu hmun ruk velah a pawng leh luau tawh thin a. Pa ber dan siam, ‘Milem leh zirlai ni lo reng reng ziah hnawk loh tur’ tih thu bawhchhiat avanga a lu hi kuk pàwn a ni. An check zawh meuh chuan kukna tur lai a van lutuk tawh avangin a pa chuan a kawk a kawk ringawt tawh thin a. Tuithak nena inthleng atan lehkhabu a pawh thlak leh chuan vuak a nih tawh tur thu hrilh a nih hnu chuan lu rit lukin a kal sawn hnak hnak thin. Hetia hauh a nih hlim te hi chuan a thil lo tih tawh avang hian a inchhir em em thin a, tih tawh loh pawh a tum ziah thin.
Khua a lo ngui a, ruah a rawn tlak phuar phuar a; lei rim a rawn nam chem chem a, a pui a pang a lian a tein hulhliap kan han chuh rak rak a. Thawm dang zawng zawng luahlana ruah sur ri chauh kan ngaihthlak cherh cherh lai hian hmana kan in kha ka ngai thin a. Zan khawharah, muthilh mai theih a nih loh va, chiapcha leh leihrik tinreng zai chiah chiah leh, lo sak rem ve niawm fahrana banga sana a chek koh koh lai te hian chhung kim lai kha ka ngai thin. Tu dang mah ngai lo va nu leh pa thlazar hnuaia kan awm lai, lungkham enghelh nei miah lo va kan tal mawt mawt lai kha a ni, ka tan hun rangkachak chu lo ni!