Kan tlai tawh… hial em?

MZP Federal Council thukhawm chuan Sairang thlenga rel a lo luh thuai dawn avangin inner line permit enfiah kawngah sawrkarin ruahmanna felfai zawk a siam theih nan MZP-in hma la rawh se, tiin an rel a. Hei bakah hian, Zofate sumdawnna leh inchimralna kawnga kan him tlan nan, a tul angin MZP-in hma la rawh se, tih an rel bawk a.
ILP chungchang hian sawi a hlawh leh vei a hlawh ang he huin hmasawnna thar hmuh tur erawh a awm ngai lo, a tih theih awm e.
State dang atangin a rukin ILP nei lo hnamdang an lo lut thei a, ILP nei zingah pawh, an trade anga hna thawk lo tam tak hmuhchhuah tur an awm reng a. Eng lai pawhin ILP fel lo leh ILP nei lo manchhuah tur an awm reng thei bawk a.
ILP pekchhuah chungchangah hian, a ‘brake’ kan rah ve deuh hi chu a tul niin a lang. Ni tina ILP pekchhuah theih zat tur hi bituk a awm a nih pawhin, tun ang em ema tam hi chu nikhat thilthuah pekchhuah loh theih ni se. Chuti a nih loh chuan, dan anga ILP neite hian ILP hmangin min chimral thei mai dawn tihna a ni.
Sumdawnna lamah ni se, mahni hming hralha hnamdangin suma an lei theih tam tak an awm a, hei hi tlawmngai pawlin an buaipui luai luai reng a. Dan anga hma la tur ber sawrkar lah, a kel-e-awl hlauh emaw tihturin a inrawlh thuk ngai lem si lo.
Heng zawng zawng hi Rel a lo luh hma atanga lo awmsa reng tawh, a sap tawng takin, ‘practice’ mek reng a ni a. Rel a lo luh thuk dawn avanga buaipui ngai tur chauh ni mai lovin, buaipui ngai reng sa tawh a ni a, “Kan tlai tawh… hial em?” tih zawhna hi kan inzawh mawlh mawlh a, nghak khawtlai lova, ‘tun’ atanga hma thar kan lak zung zung hi a hun tawh hle a ni.
Inzirtir leh infuih thar kan mamawh em em chu – ‘hnam rilru put’ hi a ni. Hnam tlemte, tawngthuchhe lovah, a chhia zawng zawngin a bawm khah tlat kan nih avangin, thil tam takah hi chuan hnamdang nena inchiahpiah dan kan zir a, kan thiam a, a tulnaah leh a tul hunah chuan ‘thliarkar rilru’ put a ngaihna tur tam tak a awm thei awm e.
A pawimawh ber chu, tanrual a ni a; tangrual tur chuan kan nihna leh dinhmun chiang taka kan hriata kan hmuh a ngai. Chutiang tur chuan mipui inzirtirna hi ngawrh taka kan kalpui mup mup a ngai a, rilru lam a inpeih hmasak phawt a ngai a ni.