Kan tu leh fate hmangaih
dan kawng hi thlak a ngai
– T Lalhlimpuia, MLA
Tunlaia nu leh pa, pi leh puten an tu leh fate an hmangaih dan chu rim taka thawh leh hrehawm pumpelh zawng a ni ta foa, hei hi thlak thlengin, hrehawm leh kawng harsa zawhna chu hmangaihna kawng dik a ni tih rilru kan put thar a ngai nia a hriat thu MLA T Lalhlimpuia chuan a sawi.
Lunglei West bialtu MLA T Lalhlimpuia hian Thawhtanni khan HSSLC Exam 2025-a Lunglei district atanga titha, top 10-a lang mi pahnih hnenah lawmpuina a hlan a. Science stream-a 4-na Gabriel Lalrinpuia s/o Kross Hmingthanzuala leh Arts stream-a 10-na (political science-a mark hmu sang ber) Rosy Lalchhandami d/o PC Lalzarliana, Lunglei Venglai mi ve ve niin, laptop leh lawmpuina thuziak hlan an ni.
MLA chuan tunlaia nu leh pa, pi leh puten an tu leh an fate an hmangaih dan kawng chu tha a tih loh thu a sawi a. Hlawhtling tura rim tak leh hrehawm taka tawrh ngaia an tu an fate tawrh tir an phal lo fo thin, tiin, “Hlawhtlinna chang tura hrehawm leh kawng harsa zawhna zawk hi hmangaihna dik leh kawng tha zawk a nih avangin nu leh pa te pawhin hemi zawnga kan fate lakah rilru kan siam thin a tul a ni,” a ti.
Zirna lamah Lunglei a vei thu leh tun ang renga an kal chuan, kum 30 a ral chuan engmah ti thei loah an awm mai a hlauh thu T Lalhlimpuia hian a sawi bawk.
Kan tu leh fate hmangaih dan kawng hi thlak a ngai – T Lalhlimpuia, MLA
Get real time updates directly on you device, subscribe now.