Kanye West leh Ty Dolla $ign ‘Vultures 1’ a la No.1

Kanye West leh Ty Dolla Sign album ‘Vultures 1’ chu Billboard 200 (albums) chart-ah a No.1 a, he chart-a kar hnih a No.1-na a ni ta a, Kanye tan 2011 hnuah he chart-a kar khat aia tam chart-a No.1 thei album a neih leh hmasak ber a ni. Hetihrual hian Yeat pawhin a album thar ‘2093’ chu No.2-ah a debut pui a, he chart-a a thlen sân ber a la ni.
Billboard 200 chart hi kar khat chhunga US-a album hralh tam dan atanga tehin chart ranking siam thin a ni a, album hralh zat chhut nan hian album tak tak hralhna bakah streaming atanga album hralhna tlukpui leh album-a hla mal hralhna atanga album tlukpui te belhkhawm thin a ni.
Vultures 1 hi a kar hnihnaah 75,000 an hralh leh a, chung zinga 72,000 chu streaming atanga album hralhna tlukpui (on-demand official stream maktaduai 95.25) niin, album tak tak hralh chu 2,000 a ni a, album-a hla mal hralhna atangin 1,000 a tling thei bawk.
Rapper Yeat album thar ‘2093’ chu 70,000 hralhin No.2-ah a debut a, chung zinga 58,000 chu streaming atanga album tlukpui (on-demand official stream maktaduai 79.15) niin, album tak tak hralh chu 12,000 a tling a, album-a hla mal hralhna chu chhiar tham loh a ni.
Yeat hi kum hnih vel kalta khan Billboard 200 chart-ah a rawn lang ve tan a, a album ‘Up 2 Me’ chu No.59 a kai a, chumi hnuaa album dang tlangzarh te chu chart top 10-ah an lang ta vek a, 2022-ah ‘2 Alive’ chu No.6 kaiin, 2022-ah vek hian ‘Lyfe’ chu No.10 a kai a, 2023-ah ‘AfterLyfe’ chu No.4 a kai leh a, tunah ‘2093’ No.2 a kai pui leh ta a ni.
‘2093’ hi February ni 16 khan hla 22 awmna album-in tlangzarh a ni a, chutah chuan Future leh Lil Wayne a thawhpuina te pawh a tel a, a tuk lawkah a deluxe edition tichhuak lehin a hmingah ‘2093 P2’ a ti a, bonus track pahnih da telin Drake a thawhpuina a dah thar a, tichuan February ni 21-ah a thar tichhuak lehin a hmingah ‘2093 P3’ a ti leh a, bonus track pali a dah thar a, hei hi chu ama official webstore atanga digital download chauhin a lei theih thung. Heng album pathum hralhna te hi belhkhawm vek a ni.
Chart No.1 hlui Morgan Wallen ‘One Thing at a Time’ chu 64,000 hralh lehin No.4 atangin No.3 a kai thar leh a, Noah Kahan ‘Stick Season’ chu 60,000 hralh lehin No.3 atangin No.4-ah a tawlh a, chart No.1 hlui SZA ‘SOS’ chu 46,000 hralh lehin No.5-ah bawk a la awm.
Cart top 10-a lang album dang zawng chu No.1 lo ni tawh vek an ni a, Taylor Swift ‘1989 (Taylor’s Version)’ chu 44,000 hralh lehin No.6-ah bawk a la awm a, Swift ‘Lover’ chu 43,000 aia tam deuh hralh lehin No.7-ah bawk a la awm a, Drake ‘For All the Dogs’ chu 43,000 hralh lehin No.10 atangin No.8 a kai thar leh a, Swift ‘Midnights’ chu 40,000 hralh lehin No.8 atangin No.9-ah a tawlh a, 21 Savage ‘American Dream’ chu 37,000 halh lehin No.11 atangin No.10 a kai thar ve leh ta bawk.