Kar tawp football hnuhma

Kar tawp khan Europe-a tualchhung league hrang hrang khelh chhunzawm a ni a, inkhel a hmuhnawm leh viau hlawm. Europe a league lian zual pangaa thil thleng langsar; kar tawpa football hnuhma thar kan hrut kual leh ang.
English Premier League
Pathianni zan khan Liverpool chuan harsa takin Crystal Palace an hneh. Reds hian champion turin point thum chiah an mamawh tawh a, Pathianni zanah Tottenham an hneh a nih chuan EPL champion thar an ni ang a. Nilai zanah Crystal Palace in Arsenal an hneh hlauh a nih chuan Liverpool hi EPL champion an ni nghal dawn bawk. Leicester City an hnehna goal hi bench atanga lut Trent Alexander-Arnold a ni a. Arnold hian club leh ram tan goal 26 a thun tawhah a ke vei lam hmangin goal vawi khat chiah a la thun a, chu chu Foxes an hnehna goal kha a ni.
Pathianni zan khan Wolves chuan mikhual an nihna hmun Old Trafford-ah Pablo Sarabia free-kick chhuih luh hmangin hnehna an chang. Sarabia hi Danny Murphy (December 2000) hnu lamah Old Trafford-ah free-kick atanga chakna goal thun leh hmasa ber a ni. United hnehtu Wolves hi tunhnaiah an khel tha viau a, EPL an khelh hnuhnung vawi ngaah an chak vek a. Kum 1970 hnu lamah EPL-ah vawi nga an chak zawn leh vawi khatna a ni a. Season kal mekah an mahni aia chak zawn rei awmchhun chu vawi 10 chak zawn tawh PSG chiah an ni.
Wolves laka tlawm United hi EPL season kal mekah vawi 15 an tlawmna a ni a, 1989-90 hnu lamah EPL-a an tlawm tam ber tum niin hun duhawm lo tak an hmang mek. United hi Old Trafford ah bik vawi riat ngawt an tlawm ta a, hei pawh hi 1962-63 hnu lamah Old Trafford-a an tlawm tam ber tum a ni leh bawk.
United hi an khelh hmabak pangaah chak vek pawh ni se point 53 bak an hmu thei tawh lova, EPL season khata point an hmuh tlem ber tum a ni chiang tawh a. 2021022 khan EPL-a point an hmuh tlem ber tum niin point 58 an hmu a, hei hi an phak dawn lo chiang tawh.
Manchester United in lak tuma an ngaihven Ollie Watkins chuan Aston Villa tan EPL-ah goal 74 a thun tling ta chiah a, Villa tan EPL-a goal thun hnem ber Gabriel Agbonlahor record a tluk der tawh a, record thar siam theihna hun tha a la nei.
Spanish La Liga
Inrinni zan khan table-a hmahruaitu FC Barcelona chuan vanneihthlak ang reng takin an mikhual Celta Vigo an hneh. Celta Vigo an mikhual tum hian Lamine Yamal chuan bul a tan lo. La Liga season kal mekah Yamal-a’n bul a tan lohna inkhelah Barca an la chak ngai miah lova, Pathianni zan khan Yamal-a’n bul a tan lohna game-a an chak vawi khatna a ni.
Barcelona player pawimawh Raphinha chuan season kal meka inelna hrang hrangah goal contribution vawi 51 a nei tling tawh a. Barcelona player ni tawh zawng zawng zingah season khatah goal contribution vawi 50 chuang nei thei palina a ni a. Lionel Messi (10 times), Luis Suarez leh Neymar te hnung a zui. Europe-ah chuan goal goal tribution vawi 55 zet nei tawh Mohamed Salah a sang ber rih thung.
Barcelona laka an tlawm tum hian Celta Vigo forward Borja Iglesias chuan hattrick a siam. Iglesias hi Emmanuel Boateng (2018) hnu lamah Barca muala hattrick siam leh thei hmasa ber a ni.
Pathianni zan khan Real Madrid in hnehna an chang. Real Madrid tan Kylian Mbappe inlan lohna game 5-ah Real Madrid hian tlawm an nei lo vek.
Osasuna forward Ante Budimir a chetha tluang zel a, La Liga season kal mekah goal 18 a thun tling tawh a, La Liga-ah goal thun tam pathumna niin a chungah hian Robert Lewandowski (25) leh Kylian Mbappe (22) te an awm. Budir hian season liam ta khan goal 17 a thun a, season liam taa a goal thun zat a khum der tawh. Budimir hian La Liga-ah goal 75 a thun tling tawh a, Croatian zingah La Liga-a goal thun hnem pahnihna a ni a, a chungah hian goal 114 thun tawh Davor Suker a awm.
Italian Serie A
Champion tuma inelna boruak a nung thar hle a, khelh hmabak panga chauh awm tawhah Inter Milan leh Napoli ten point 71 ve ve an hmu mek. Inter Milan leh Napoli te hi season tawp thlenga an point hmuh zat a inang a nih chuan Serie A-ah a vawi khat nan play-off hmangin champion zawn a ni ang.
German Bundesliga
Bayern Leverkusen tan Patrik Schick a chetha chho hle a, season kal mekah goal 24 a thun tling der tawh a. Hei hi Bayer Leverkusen tan tho season khata goal a thun hnem ber 2021-22 season ah game 31 atanga goal 24 a thun chu a tluk der tawh.
Bayern Munich forward Harry Kane chuan Bundesliga game hmasa 60 atanga goal 60 thun tling thei Erling Haaland record tluk tumin hma lam a pan zel.