Kar tawp football hnuhma langsar

Chawlhkar tawp khan Europe-a tualchhung league lian zualte khelh chhunzawm a ni a. El Clasico khelh kar a nih tel bawk vangin result beng verh tak tak a awm. Inkhel hmuhnawm tak takah hnuhma thar hmuh tur a awm belh nual a, kar tawpa football hnuhma langsar zual kan hrut kual leh thuak thuak ang.
Engligh Premier League (EPL)
Pathianni zan khan champion thar Liverpool leh pahnihnaa awm mek Arsenal te chu Anfield ah an inkhel a, 2-2 in an inhnehtawk. Liverpool hian an mualah bul an tan tha viau a, minute 20 leh 21-ah goal thunin si hnih faiin hma an hruai reng. Gunners laka an hmahruaina an hum zo lova, Anfield-ah ngei 2-2 in an inhnehtawk. 2-0 a hmahruai chunga an chak zo lo hi Liverpool in Anfield-ah si hniha hmahruai chunga an chak zawh loh vawi thumna chauh a ni.
An mualah chak zo lo mah se Liverpool hi an mualah khelh 12 chhung an tlawm lo tawh a,English top-flight-ah an tlawm loh zawn rei ber dawttu a ni a. Club record rih rual turin vawi khat tlawm loh chiah an mamawh tawh.
Pathianni zan khan Manchester United chu Old Trafford-a an mikhual West Ham United lakah 2-0 in an tlawm. EPL season kal mekah United hi an muala an tlawm vawi kuana a ni a. EPL season khatah Old Trafford-a an tlawm tam ber record an nihrual a. Record chhe zawk siam thei dinhmunah an la ding cheu bawk.
United ang thova talbuai Tottenham chu an mikhual Crystal Palace lakah 2-0 in an lo tlawm ve bawk. Spurs hi EPL season kal mekah vawi 24-na a ni a. Kum 1991-92 hnu lamah EPL a an tlawm tam ber tum niin, record ding lai hi game khat chiahin an phak lo mek.
Spanish La Liga
Pathianni zan khan khwvela inkhel ngaihven hlawh ber pawl El Clasico khelh a ni a. An mualah 2-0 ngawta an hnufual hnuin Barcelona chuan 4-3 in Real Madrid an hneh let. Hei hi El Clasico-a chak let ropui leh lian ber a ni a. Kum 1950 leh 1959 a record lo awm tawh an nihrual.
Real Madrid lakah hian Raphinha chuan goal hnih a thun Raphinha hi season kal mekah a chetha hle a, goal 34 lai thun tling tawhin season a hman that ber tum a hmang mek. La Liga player zingah amah aia goal thun tam chu Robert Lewandoski leh Kylian Mbappe te chiah an ni.
Barca hian season kal mekah Real Madrid an ngam viau a, vawi li an inhmachhawn tawhah an chak vek. Barca manager Hansi Flick hi Pep Guardiola hnu lamah El Clasico-a vawi chak zawn thei awmchhun a ni. Barca hian Real Madrid an hmachhawn hnuhnung vawi liah goal 16 ngawt an thun a, season khatah Real Madrid laka goal thun tam ber an ni.
An elpui lian Barcelona laka an tlawm tum hian Mbappe chuan Barcelona lakah a vawi khat nan hattrick a siam. Kylian Mbappé hian a club thar Real Madrid tan hattrick a siam vawi thumna a ni a. Real Madrid player zingah kum 30 zet hnuah Barcelona laka hattrick siam leh thei hmasa ber a ni. Kum 1995 khan La Liga-a Barcelona an hmachhawn tumin Iván Zamorano chuan hattrick a siam. Zamorano hnung zui thei an awm loh vang vang hnuin Mbappe a rawn lang ve leh ta nawlh a ni. Mbappe hian season kal mekah Real Madrid tan gaol 39 ngawt a thun tling tawh a, Real Madrid tan season khatnaa goal thun hnem ber niin Iván Zamorano record a khum ta bawk. Hei mai hi a la ni lo, Mbappe hian La Liga-a a season hmasa berah goal 27 a thun tling der tawh a, La Liga season khatnaa goal thun hnem ber Cristiano Ronaldo record khumin record thar a siam hial tawh bawk.