Kar tawp football hnuhma langsar

Kartawp khan Europe-a tualchhung league hrang hrang khelh a ni a, England lamah chuan English Carabao Cup final khelh a ni bawk. Kar tawpa football hnuhma langsar zualte kan hrut kual leh thuak thuak ang.
Carabao Cup
Pathianni zan khan Wembley Stadium-ah English Carabao Cup final khelh a ni a, inkhel hmuhnawm takah Manchester City chuan Nico O’Reilly goal hnih thun hmangin an elpui lian Arsenal an hneh a, ropui takin an champion. City hi Wembley Stadium-ah an chetha viau thin. Kum 2007 a Wembley hawn a nih hnuin City hi vawi 15 an chak tawh a, Chelsea record khumin 2007 hnu lamah Wembley-a chak ngun ber an ni.
City lakah tlawma champion zo ta lo Arsenal kha League Cup final-ah a zawnin vawi lo ngawt an tlawm a, League Cup final a tlawm zawn rei ber an ni.
Manager ropui Pep Guardiola chuan League Cup (Carabao Cup) ah City hi vawi nga a champion pui tawh a. Manager zingah Carabao Cup-a team khat champion pui tam ber a ni a, Brian Clough, Alex Ferguson leh José Mourinho te record a khum. City hi League cup final an khelh hnuhnung vawi 10-ah vawi kua an chak a, an ni aia champion ngun chu Liverpool chauh an ni.
Arsenal laka goal hnih thun Nico O’Reilly kha kum 21 leh ni 1-a upa a ni a, League Cup final a goal hnih thun thei zinga naupan lamah pathumna a ni a, a chungah hian Wayne Rooney leh Ronnie Whelan te an awm.
English Premier League
Season kal mekah Tottenham an che chhe tak zet a, game 31 an khelh tawh atangin point 30 chauh an hmu. Hei hi kum 1914-15 hnu lamah League-ah game 31 atanga point an hmuh tlem ber tum a ni.
Raúl Jiménez chuan EPL-a penalty a pet tawh vawi 14 a la pet goal vek a, Matt Le Tissier, Mohamed Salah leh Harry Kane te hnu lamah EPL-a penalty pet goa zawn rei ber a ni.
Pathianni zan khan Newcastle United chu an mikhual Sunderland lakah uiawm takin an chak zo lo. Newcastle hi season kal mekah chak theihna hun tha nei chunga chak zo lo tam ber an ni.
Spanish La Liga
Pathianni zan khan Real Madrid chuan Madrid derby-ah Atletico Madrid chu 3-2 in an hneh. He inkhelah hian Vinicius Junior chuan goal hnih a thun. Manager lailawk Álvaro Arbeloa hnuaiah Vinícius Júnior hi a khelh tha viau a, vawi 16 a khelh tawh atangin goal 11 lai a thun. Hemi hun chhungah hian Vini aia goal thun hnem zawk chu Harry Kane (17) leh Lamine Yamal (12) te chauh an ni.
Real Madrid hian an mualah Atletico Madrid an ngam viau a. Santiago Bernabeu-a an intum hnuhnung vawi 13-ah tlawm an nei lo. Hei hi Madrid derby-ah an tlawm loh zawn rei pahnihna a ni a. Atletico Madrid laka an tlawm loh zawn rei ber chu 1973-83-ah vawi 15 ngawt an tlawm lo zawn kha a ni.
Pathianni zan khan table-a hmahruai mektu FC Barcelona chuan an mikhual Rayo Vallecano chu 1-0 in an hneh. Barcelona hi season kal meka an mualah an khel tha thei viau a. An mualah La Liga an khelh tawh vawi 15-ah an la chak vek a ni.
Italian Serie A
EPL club te pawhin an awh em em Kenan Yildiz chu Juventus tan a chetha chhunzawm zel a, season kal mekah goal 10 a thun tling tawh. Yildiz hi Juventus tan kum 21 tlin hmaa season khatah goal 10 chin thun tling thei hmasa ber a ni.