Karleh atangin Mizoram Cricket League

Mizoram chhunga cricket inelna huanga sum che vel tam berna zinga mi leh leaque ngaihven hlawh ber zinga tel pha Mapuia Memorial Mizoram Cricket League (MCL) vawi 12-na chu May ni 14, 2024 hian Suaka Cricket Ground (SCG), Sihhmuiah khelh tan a ni dawn.
Hemi atan hian May ni 3 zan khan Aijal Club-ah player lilamna hun huaihawt niin, player lei theiha chhawpchhuah 40 zingah player 20 lei an ni.
He’ng player lei zingah hian Zemabawk Pitchers CC player ni lai Vanlalpekhlua of Zemabawk chu player man to ber niin, Chanmarians CC-te’n Rs. 37,000-in an lei.
Player man to ber dawttu chu Venghnuai Raider CC player K. Lalthazuala (Maubawk) niin Rs. 30,000-a lei a ni.
MCL atana slot ruak pahnih leitu Zarkawt Lords CC leh Chhinga Veng CC-te’n player lilam hi an duhzawng based price-in an thlang thei a, Zarkawt Lords CC-te’n thlang hmasain F. Vanlalmuanzuala (Bawngkawn South CC) leh Lalhmangaiha (Luangmual CC)-te an thlang.
Chhinga Veng CC-te’n G. Lalbiakvela (Luangmual CC) leh Marcus Lalpekhlua (Pacers CC)-te based price-in an la bawk.
Hemi zana player leinaah hian Rs. 2,86,600 hmanral a ni.
MCL khel tur hian 1st Division screening tournament-a top 4 chin – champion lai Chanmarians CC, Kulikawn CC, Ramhlun Venglai CC leh |huampui Chinari CC-te an tling sa a, hmunruak dang pahnih hi CAM club, district leh recognised club ni lote tan pawha lei theih niin, Zarkawt Lords CC leh Chhinga Veng CC-te’n chuhpuitu awm loin Rs. 1,50,000 ve vein an lei a ni.
Kumin MCL-a champion team hian cheng nuai thum an dawng ang a, a hniam ber pawhin nuai khat an dawng tling ang.
He’ng bakah hian transportation, jersey leh refreshment thlengin MCL team-te hian a thlawnin an dawng vek dawn a ni.
Mizoram Cricket League hi T20 format-a khelh tur niin, match zawng zawng SCG, Sihhmuiah khelin, May ni 14-a tan a, June ni 1-a zawh fel tura ruahhman a ni.