Kawng siamtu, lungawilote leh district thuneituten sawikhawm
Lawngtlai district chhunga national highway zauh hna thawh mek leh Kaladan Multi Modal Transit Transport Project (KMMTTP) kawngpui laihnaa zangnadawmna ngiata Lawngtlai District Land Owners’ Association-in sawrkar an nawr mek chungchangah Thawhtanni khan district bawrhsap H Lalhmingthanga hoin NH-54 zauh hna thawktute, Lawngtlai District Land Owners’ Association hruaitute, Central Young Lai Association hruaitute leh sawrkar official-te an thukhawm.
Bawrhsap chuan kawngpui pahnih chu district mipui inkalpawhna leh ei leh bar thiarvelna kawng pawimawh ve ve a nih avangin tha taka siam leh enkawl a tul tih a sawi a. Ram tana thil tha duh avanga kawng tha neih duha hmalakna chu lawmawm a tih thu sawiin, mipui tuarna thlen thei zawnga hma lakna erawh awm lo hram se tha a tih thu a sawi.
Thutkhawmah hian NH-54 kawngpui siamthat hna thawh meka Lawngtlai leh Kawlchaw ‘W’ inkara hnathawh chhe lutuk nia an hriat avanga Central YLA-in kumin August 8 atanga Lawngtlaia NHIDCL leh ICT office an kharsak chu August 18-a Central YLA hruaitute leh hnathawktu company hotuten hna tha lo lai a hmuna en hoa, hna tha zawka thlak tura an inbiakrem hnu ah hawn a ni leh tawh tih sawi a ni. Hemi chungchangah hian hna tha zawka thawh a nih theihna’n official-te leh YLA-in mahni zawnah hma lak nise, an ti.
Kum 2010 atanga hna thawh tan, KMMTTP kawngpui, Lawngtlai atanga Zochachhuah inkara sialin an ram a tihchhiat sak intel khawm hruaitute chuan kum 13 chhung zangnadawmna phuta hma an lo lak tawh thu te, a kawtawpah an tan tawh thu leh kumin August 1 atanga DCF (Wildlife) Chhimtuipui Wildlife Division Lawngtlai office-a thawktute chu office kai thei loa an dan te, KMMTTP kawngpuia hna thawktu company-te pawh an chhet chhuah an remtih loh thu te an sawi a ni.
Bawrhsap chuan ram neitu intelkhawmte hmalakna chuan district chhimlam leh khawthlang lam mipui tan inkalpawhna leh ei leh bar mamawh thiarvelnaah harsatna a thlen theih avangin hnathawktute chetchhuah an remtih loh chu titawp turin a ngen a. Association hruaitute chuan bawrhsap ngenna chu zahawm an tih thu leh pawl member inkokhawmin an lo sawizui tur thu an sawi a ni.