‘Kawtkaia sawhthing lei kan tiam lo’

Budget Session tir lamah sorkar hruaitute’n sawhthing lei a hautak thu an sawi tawh a, a thartute kawtkaia lei an intiam loh thu an sawi leh.
March ni 5 khan agriculture minister leh chief minister-in sawhthing hi a thartute kawtkaiah an lei loh thu an sawi a, sorkarin chutiang a tlin loh thu an sawi.
Agriculture minister PC Vanlalruata’n primary society 678 leh secondary collection centre-te din a nih thu a sawi a, primary society hnenah a thartute’n sawhthing an dah a, chu chu secondary collection centre-ah an thlen tih sawiin, chumiah chuan an anmahni an lo inbuaipui a ngai tih a sawi.
“Sorkarin a phurh man kan pe thei lo a ni,” a ti a, “… anmahni sum sengin an lo phur lut ve thin a ni,” a ti bawk.
“Sorkarin sum tam tak kan seng tawh a, khang zawng zawng kha sorkarin a tih chuan kan tlin lo a ni,” a ti a, “Kuthnathawktute pawhin min hrethiam se kan duh khawp mai,” tiin a chhunzawm a ni.
“Kawtkaia lei hi kan sawi lawk a nih loh avangin secondary collection centre-ah kan lo sawiu lawk angin kalpui chhih mek a ni,” a ti bawk.
House leader Lalduhoma, chief minister pawhin hemi ni hian sawhthing lei chungchang hi a sawi a, “Ziak pawhin tawngkam pawhin in kawtkaiah kan lei ang tih hi kan sawi ngai reng reng lo a. Tu sorkar mahin an kawtkaia lei vek hi chu an tlin kan ring lo a,” a ti.
Sawhthing hi kg-ah Rs 50-in an lei a, sorkarin a ip Rs 10 man a tum bawk niin a sawi a, collection centre kan siam ang a, chutah chuan sorkar rate angin kan lei ang tiin an intiam niin a sawi.
“Kan intiam lohma primary society leh secondary collection centre inkar phurh man hi chiu sorkarin a pe thei lo a ni,” a ti.