Kedarnath tlawh chopper tlaah a chuang pasarih thi vek

Kedarnath tlawh chopper tlaah a chuang pasarih thi vek
Uttarakhand-a Kedarnath temple atanga Guptkashi pana thlawk helicopter a tla a, a khalhtu telin mi pasarih an thi.
Aryan Aviation Helicopter hi Gaurikund leh Sonprayag inkar ramngawah a tla a, a chhuah leh a tumna inkar hi minute 10 chhung chauh thlawk a ni.
Pathianni tuk dar 05:20-a chopper tlaa chuang mi paruk hi naute thla 23 leh puitling panga, biakzina kal leh a khalhtu niin Uttarakhand Civil Aviation Development Authority (UCADA)-in thu a chhuahah a tar lang.
Kedarnath Dham tlawh haw lam an ni a, khaw awm dan a dik lo hle a. A khalhtu hian phaikuam atanga invawrh sanpui a tum chu ti thei lovin an tla a ni.
“National Disaster Response Force (NDRF) leh State Disaster Response Force (SDRF) team telin thuneituten lak chhuah leh tul dang hna an thawk mek,” tiin District Tourism Development hotu, Rahul Chaubey-a’n Pathianni chawhma khan a sawi.
A chuang zinga pakhat hi Badarinath Kedarnath Temple Committee (BKTC)-a thawk niin Garhwal Commissioner Vinay Shankar Pandey-a’n a sawi a. Mi dang panga erawh Uttarakhand, Uttar Pradesh, Maharashtra leh Gujarat atanga sakhaw hmun tlawh an ni.
Tual chhung mi, ran chaw zawnga ram hnuaia chhuakten helicopter tla hi hmuin thuneituten an hrilh a. NDRF leh SDRF team-in Gaurikund hi zing dar 07:00 velah thlengin kein a hmun hi an pan a, dar 08:55 vel atangin a hmunah hna an tan thei.
Uttarakhand Chief Minister Pushkar Singh Dhami chuan chhiatna thleng hi pawi a tih thu X-ah a tar lang a. An state-a helicopter khalh leh standard operating procedure (SOP) zam a tul thu leh hma lak a nih tur thu a sawi nghal.
Dhami-a hian chief secretary chu mi thiamte awmna committee dina SOP hi buatsaih turin a ti a ni.
Tun tum chhiatna thleng hi Himalaya tlangdunga awm, May 2 atanga tlawh theihna hun hawn tan, Kedarnath temple tlawh leh a kaihhnawiha helicopter tlak pangana a ni ta a. June 7 khan Kedarnath pan chopper chu a talbuai avangin kawngpuiah a lo tum tawh a. Chenna in hnaih takah tumin a bula lirthei hunna pawh a tichhe nual a. A chuang mi panga erawh him hlauhvin a khalhtuin hliam tenau a tuar.