Kendrick Lamar leh SZA ‘Luther’-in chart record siam

Kendrick Lamar leh SZA ‘Luther’-in chart record siam
Kendrick Lamar leh SZA hla hit ‘Luter’ chu Billboard Hot 100 (singles) chart-ah a No.1 a, he chart-ah hian kar 12 a No.1 tling ta a, soloist mipa leh hmeichhe duet a he chart-a No.1 ni rei thei ber a ni ta. Kar kalta khan PuffDaddy leh Faith Evans ‘I’ll Be Missing You’ (featuring vocal group 112)-in 1997-a kar 11 No.1 ni a record a siam a rawn nihrual a, tunkarah a No.1 leh tak avangin ‘I’ll Be Missing You’ hi kalsanin, amahin record a siam ta a ni.
‘Luther’ hi R&B/Hip-Hop hlaa he chart-a No.1 ni rei thei ber a ni ta bawk a, 2020-a Roddy Ricch ‘The Box’-in kar 11 No.1 ni a record a lo siam tawh chu a rawn lehpel ta bawk a ni.
Billboard Hot 100 chart hi kar khat chhunga US-a hla lar dan tehna niin, chart ranking siam nan hian all-genre US streaming (official audio leh official video), radio airplay leh sales data te chu tehna pawimawh a ni.
‘Luther’ hian kar khat chhungin radio airplay ngaithlatu maktaduai 65.4, stream maktaduai 19.1 leh sales 2,000 a la nei thei a, hei hi a kar 12 nan chart-ah a No.1 pui leh ta a ni.
Alex Warren ‘Ordinary’-in stream maktaduai 21.6, sales 6,000 leh radio airplay maktaduai 24.5 nei lehin No.2-ah bawk a la awm a, chart No.1 hlui Lady Gaga leh Bruno Mars ‘Die With a Smile’ paw No.3-ah bawk a la awm.
He chart-a No.1 ni rei record nihrual a, kar 19 No.1 thei, Shaboozey ‘A Bar Song (Tipsy)’ chu No.5 atangin No.4 a kai thar leh ta a, he hla hi chart top 5-ah kar 44 chhung a lang tling ta a, The Weeknd ‘Blinding Lights’ lehpelin, he chart top 5-a lang rei thei ber record a siam.
Drake ‘Nokia’ chu No.4 atangin No.5-ah a tawlh a, Chappell Roan ‘Pink Pony Club’ chu No.6-ah bawk a la awm.
Chart No.1 hlui Teddy Swims ‘Lose Control’ chu No.7-ah bawk awm lehin, he chart top 10-ah hian kar 61 a lang tling ta a, chart top 10-a lang rei ber record a siam a sawhnghet leh sauh a, chart-a a lan hrim hrim chu kar 90 tling tawhin, The Weeknd ‘Blinding Lights’ nihrualin, he chart-a lang rei ber dawttu an ni a, kar 91 chart-a lang thei Glass Animals ‘Heat Waves’ chiah a pha lo.
Benson Boone ‘Beautiful Things’ chu No.9 atangin No.8-ah a insawn thar leh a, Doechii ‘Anxiety’ chu No.10 atangin No.9 a kai thar a, chart No.2 pawh lo ni tawh Morgan Wallen ‘I’m the Problem’ chu No.8 atangin No.10-ah a tawlh ve thung.