Kerala in Centre thupek hnawl hmak
Sorkar laipuiin kerala a ration shop tina Prime Minister Narendra Modi thlalak signboard leh flex board a tar vek tura tih chu ‘election stunt’ tihsakin Chief Minister Pinarayi Vijayan chuan Union government in titura a tih chu an tih dawn loh thu Kerala Assembly-ah a sawi.
Kerala sorkar chuan he mi chungchang hi Election Commission hnenah pawh a hrilh tur thu a sawi bawk a.
“Public distribution system leh ration shop te hi hun rei tak Kerala-ah kalpui a ni tawh. Tunah Union government chuan la awm ngai lo thupek Lok Sabha inthlan hnaih tawh takah campaign nana hman tumin hma a la a ni. Union government hnenah PM Modi thlalak kan tarloh tur thu hi kan hrilh ang” tiin Vijayan chuan a sawi.
Vijayan thusawi hma in Food and Civil Supplies Minister G.R. Anil chuan House hnenah Union government chuan Food Corporation of India (FCI) leh Food and Civil Supplies department te chu flex board Modi thlalak tarna tur ration shop 10,000 ah dah veka report thehlut turin a ti a. Hei mai bakah hian Prime Minister selfie point ration shop 550 a dah turin a ti bawk a. Union government branding chuanna carry bag pawh customer te hnenah pe turin a ti bawk tiin a sawi a ni.
Anil chuan Union government chetlak dan chu sawiselin Bharat Rice kg ah Rs 29 zela pek chu federal principles kalhna a ni a ti bawk a.
State sorkar chuan buhfai te chu Open Market Sale Scheme (OMSS) hmangin FCI hnenah leiin customer te hnenah kg ah Rs 24 zelin an pek thu a sawi bawk a. Chutianga hma an lakna chu Union government chuan dangchatin Kerala in OMSS hmanga buhfai a lei an khapsak hmaka a.
Chumi hnuah Bharat brand rice te chu outlet dang hmangin a sem a, State public distribution system chu leh ratin shop te kal kanin chet an la a ni a ti bawk a. Centre hian a mamawhtu ten hetiang outlet hrang hmanga buhfai an pek hian an dawng ngei em tih enfiah theihna a nei lo a ti bawk a.
Minister chuan Union government chuan buhfai te chu Food Security Act hnuaiah Kerala mipui 43% te hnenah chauh a pe a. Mipui dang 57% te hnenah State sorkar chuan subsidised rate in a pe a ni a ti bawk.