Kerala vaukama Singapore lawng kanga thawk 18 chhanchhuak

Kerala vaukama Singapore lawng
kanga thawk 18 chhanchhuak
Kerala vaukamah Singapore lawng lianah Thawhtanni khan a thil phurh puak avangin kangmei a chhuak nasa hle tih defence thuneituten an sawi a. A thawk mi 18 chhanchhuah niin pali erawh an chin an la hre lo.
He thil hi zing dar 09.20 vela thleng niin Kerala-a Kunnur district-a Azhikkal atanga tuipui mel 44 vela hla, Kochi atanga hmarthlang lam tuipui mek 130 velah hlaah a ni.
Defence thuneitute chuan MV Wan Hai 503-ah hian thawktu mi 22 an chuanga , 18 chuan lawng hi kalsanin Indian Navy leh Indian Coast Guard (ICG)-ten an chhanchhuak zui tih an sawi.
Mangaluru Port-a Navy lawng, INS Surat-ah dah niin a tul angin buaipui zui an ni.
Lawng lian hi Colombo, Sri Lanka atanga Nhava Sheva, Mumbai pan niin Thawhlehnia thleng tura ruahman a ni.
“Lawng lai velah tak kangmei inman kai chak tak hi a chhuak a, hriat mai theih chinah chuan a bungraw phurh bawm lian (container) 10-15 vel chu tuipuiah a tla,” tiin ICG-in thu an chhuah.
Thawktute hi Chinese pariat, Taiwanese paruk, Myanmarese panga leh Indonesian pathum an ni.
“Thil a puaha a kan hnuah thawktute hian an kalsan a, 18 chhanchhuah niin mi pali chin hriat a la ni lo va, zawn hna thawh mek zel a ni,” an ti.
Thlalak thehdarhah chuan metre 270-a sei, metre 12.5-a zau lawng lai vel takah kangmei hi a chhuak a. ICG-in vansang atanga thlir theihna life raft leh hmanraw dang keng Dornier aircraft pahnih an tir nghal.
ICG hian kang thelh thei bik leh khuarel tichhe thei veng thei lawng telin an lawng panga an thawhchhuahpui a, an buaipui.
Maritime Rescue Coordination Centre (MRCC), Mumbai chuan International Safety Net (ISN) tichhuak nghalin a bul hnaia sumdawng lawng lian pahnih, MV AMBRA leh MV ONE MARVEL te chu an kawng thlaksak an ni.
Flag Administration of Singapore hnenah pawh thil thleng hi hrilh tawh an ni a. Directorate General of Shipping (DGS), India chuan lawng neitute hnenah a buaipui theitu leh kang thelh thiam tir turin a ti.
Defence thuneitute chuan nunna hum leh kang thelh chu an ngaih pawimawh ber a ni tih an sawi.
Azhikkal Port-a hotu lian chuan lawng kang hian a bungraw phurh zingah thil hlauhawm, kang duh chi tlang leh tui bakah mihring taka hlauhawm thei a tel niin a sawi.
May 24 khan Kerala vaukamah tho hian Liberian lawng, MSC ELSA-3 chu chesualin vaukam atanga tuipui mek 14.6-a hlaah a pil a ni.