Khamrangah eco tourism kalpui tum

Khamrang khuaah eco tourism kalpui tum a ni a, Zirtawpni khan Tourism minister Robert Romawia Royte chuan a lungphum a phum.
Tourism minister chuan Mizoramin Responsible Tourist Policy a neih hnuah Khamranga village based eco tourism siam tum a ni chu lawmawm a tih thu a sawi a. India ram pum huapa tourism lama Mizoram kan lan ve theihna a nih a beisei thu a sawi. “Mizo kan nihna, kan culture, kan sakhua humhim chungin tourism hi kalpui a ni dawn a. Tourism kaltlangin kan ram leh hnam kan pho chhuak zel dawn a ni,” a ti.
Responsible tourism leh village based eco tourism thil tum chu, project awmna khaw mipuiin a hlawkna lo hlawkpui tura din a nih angin, Khamrang chu a hmasa ber an ni, tiin, a hlawhtlinna’n theihtawp chhuah turin a chah.
Tourism hotute sawi danin, Khamranga tourism tihhmasawnna tur sum hi Ministry of Development of North Eastern Region (DoNER) hnuaia North East Special Infrastructure Development Scheme (NESIDS) atangin cheng nuai 800 hmuh a ni a. Mizorama Responsible Tourism flagship project hmasa ber tur niin, kum hnih chhunga zawhfel tum a ni.
Hmalaknaah hian component hrang hrang – Khamrang village, Khamrang puk, Lungkulh, Bak Puk trekking, Lungkhawthlir, Thangruma hmun te awlsam leh nuam zawka an tlawh theihna’n siam tum a ni.