Kharge-an Shah hnenah ngenna ziakin thlen

Assam Police tena Congress leader Rahul Gandhi laka thubuai an ziah luh hnu lawkah Congress president Mallikarjun Kharge chuan Home Minister Amit Shah hnenah lehkha thawnin party leader Rahul Gandhi an Bharat Jodo Nyay Yatra Assam-a a neih lai ‘security issues’ a neih te a hrilh hria.
Lehkha a thawnah Kharge chuan Shah chu yatra neih laia Rahul Gandhi himna ngaihtuah turin a ngen a.
Assam police te chuan Rahul Gandhi leh Congress leader dang te chu Guwahati police te bei tura mipui chawkphur tiin thubuai an siamsak a ni.
Police te chuan Gandhi kaihhruai Yatra chuan Guwahati a luh an remti lo va, hei hi duh lovin Congress worker te chuan police tena khawpui pawna daidanna an siamte chu an thiat a ni.
Union home minister hnena lehkha a thawnah Kharge chuan tum tam tak Assam police te chuan January 18 a Yatra in Assam a luh atangin Z+ security nei Rahul Gandhi hnena security tha tawk an pek lohna a tam hle a ti a.
Chungte chu ziak langin Sibsagar district, Lakhimpur, Sonitpur leh Nagaon ah te tiin a ziak lang a.
Kharge chuan Assam-a Yatra nikhatnaah Assam police-te chuan Yatra him taka kalpui a nih nana hmalak aiah Amguri, Sibsagar district a BJP te poster chu an veng zawk a ti a.
A tukah BJP te nena inzawmna nei misualte chuan Lakhimpur district-a Yatra hoarding leh poster-te chu an pawtthla a ti bawk a.
A hnuah Yatra Arunachal Pradesh atanga a let leh hnuah Sonitpur district-ah nasa taka beih a tawk a ti a. He Sonitpur district a local Superintendent of Police chu Assam Chief Minister Himanta Biswa Sarma unau a lo ni leh zel tiin Kharge chuan a ziak bawk.
“BJP worker tena Indian National Congress Social Media team leh kan General Secretary Shri Jairam Ramesh te an beih lai chu a thlir reng a. Ramesh car chuan beih a tawk a, anti-BJNY (Bharat Jodo Nyay Yatra) slogan aupui bawkin, lirtheia BJNY sticker te an pawtthla a, passsenger thutna lama thu te chu tuia theh an tum bawk” tiin Congress chief chuan a sawi.
“Hemi ni vek hian Sonitpur district ah BJP district party worker-te chuan Rahul Gandhi convoy chu panin an lo dangchat a ni. BJP worker-te hian Assam Pradesh Congress Committee President Shri Bhupen Borah chu kutthlakin thisen an chhuah hial a ni” tiin Kharge chuan a ziak bawk.
January 22-ah Nagaon district ah BJP worker-te chuan Gandhi convoy lo dangchat lehin hnaih taka kalchilhin dinhmun derthawng takah an siam a ni, tiin Kharge chuan a sawi bawk a ni.
“Heng thil duhawmlo tak tak thlengah hian Assam Police-te chuan awmze nei takin BJP worker-te chuan Rahul Gandhi convoy chu hnai taka an pawh theih an remti a, chu chuan security tibuaiin amah leh a team-te himna a tiderthawng a ni” tiin Kharge chuan a sawi bawk.
Congress chief chuan heng misualte hi finfiahna tam tak leh thil an tihsual tam tak finfiahna a awm chungin man an awm lo va, chhui chian pawh a ni hek lo a ti bawk.
“Dinhmun derthawng taka thil a awm zel avangin Yatra chu ruahman anga a kal theih nan Chief Minister of Assam leh Director General of Police te chu Rahul Gandhi emaw Bharat Jodo Nyay Yatra member tinte lakah thil duhawmlo a awm loh nana hma la tura hrilh turin ka ngen che a ni” tiin Kharge chuan Shah hnena lehkha a thawnah chuan a tarlang.
Kharge lehkhathawn hi share zuiin Congress general secretary Jairam Ramesh pawhin X ah post siamin Congress president Mallikarjun Kharge chuan Union Home Minister hnenah Bharat Jodo Nyany Yatra Assam a neih meka Rahul Gandhi security tha lo tak chungchang hrilhhriatna a nei tiin a sawi bawk.