Khawhai in Semi-final an lut

Nilaini khan Mizoram Volleyball Association (MVA) buatsaih JJS Trucking Bharat Benz Inter Village Volleyball tournament 2023 khelh chhunzawm a ni a. Mipa lamah Khawhai leh Chhinga Vengin hnehna changin quarter-final an lut a. Hmeichhe lamah Diakkawn VC Kolasib leh Lunglei Serkawn ten hnehna changin, semi-final an lut ve bawk.
Nilainia quarter-final hmasa berah Volleyball thiam khua pahnih Khawhai leh Ngopa te an inhmachhawn a. Aizawl khaw pawn team tha pahnihte inkhel hmuhnawm takah YMA Inter Branch Vollayball final khel tawh Khawhai in hnehna an chang a, Mizoram champion nih tumin hma lam an pan.
Khawhai hian Ngopa lakah bul an tan tha a, harsa lutuk lovin set khatna an la. Set hmasa ber an hloh hnuin Ngopa an insiam tha a, awlsam zetin set hnihna an la a, inkhel boruak a sang thar leh zual. Set khat ve ve an lak hnuin Khawhai an insiamtha a, harsa takin set hnih an la zawn a. 25-19, 14-25, 25-19 leh 25-23 a hnehna changin semi-final lut hmasa ber an ni.
Mipa inkhel pahnihnaah Volleyball-a veng lian pahnih Chhinga Veng LC leh Muanna veng LC te an inhmachhawn a, inkhel hmuhnawm takah Chhinga Veng chuan harsa takin hnehna an chang a, Khawhai hmachhawn turin semi-final an lut.
Chhinga Veng hian Muanna Veng lakah bul an tan tha lova, set khatna an hloh phawt. Set hnihna a lak hnuin set thumna an hloh zui leh a. Set lina an an lak hnuin deciding set-a deuce-ah chungnung zawkah an tang zui leh hlauh bawk a. Inkhel hmuhnawm tak chu 22-25, 25-21, 27-25, 20-25 leh 16-14 a tawpin Chhinga Veng in hnehna hlu tak an chang a, semi-final an inhlangkai.
Mipa semi-final hmasa zawkah Khawhai leh Chhinga Veng an inhmachhawn zui leh dawn. Anni hi champion tura rinkai ve ve an ni a, inkhel hmuhnawm tak an chhawpchhuah ngei rin a ni.
Nilaini a hmeichhe quarter-final hmasa zawkah champion lai Diakkawn VC Kolasib chuan Dinthar LC an hmachhawn a, set hloh lovin an chak a, 25-12, 25-18 leh 25-16 a hnehna changin, semi-final an lut. Hmeichhe lama inkhel dangah Serkawn VC Lunglei chuan 25-14, 25-19, 25-14 in an khingpui Armed Veng ‘S’ LC an hneh a. Semi-final an lut ve bawk.