Khawpui leh tuihawk luankawr

Kum 40 vel kalta hma lamah kha chuan tun ang em em hian khawpui chhungah leimin leh in chim a thleng ngai meuh lo a tih theih awm e. Khatih lai khan tuiluankawr la changtlung lo mah se, building sakna lei laih hek kha a la tam hran lo.
Khawpuiin hma a han sawn a, mihring kan tam zel a, building rit pui pui a ding ngir khep khup ta a. Building regulations awm ang ang pawh Aizawl Development Authority (ADA) khan a nihna tur angin a kengkawh hlei thei lo va, tuiluankawr te pawh a mumal loh avangin ruah a sur hlek chuan kawngpui dungah tuihawk a luang dul dul thin. Khatiang khan hun rei tak kan awm a.
Khawpui enkawltu Aizawl Municipal Council (2008) a lo piang a, zawi zawiin khawpui chhung inrelbawlna hna kenkawh kawngah mawhphurhna zau zawk an rawn la ta a. Khawpui hmasawnna tura ruahmanna hrang hrang an duan zingah pawh tui chhe paihna kal dan te, tui luan kawr kal dan te leh bawlhhlawh paih dan turte a tel a. Tuna kan hmuh mek ang hian hmasawnna tha tak kan nei chho ta a.
Municipality pawh Council atangin Corporation-ah a kaisang a, municipality hnuaiah kum 15 kan awm tawh hnu hian, rin ang leh beisei angin khawpui hmasawnna hi a kal vut vut lem lo niin a lang. Hma sawn theih lohna zingah ‘tuiluankawr’ hi a tel awm e.
Tuiluankawrah hian AMC-in hma a la miah lo a ni lova, hmalakna chu a kal ve zel tho; mahse, kum 15 chhunga tuiluankawra hmasawnna hmel hi a ropui lem lo. Municipality term hmasa ber kha chu lo ngaithiam ta pawh ni ila, a hnu term hnih kum 10 chhung khan hmasawnna hman hun chu a awm a ni.
Khawpui chhung tuiluankawr sawngbawlna hna hi AMC mawhphurhna chauh a ni bik lo va, sawrkar laipui atanga khawpui tihhmasawnna tur project lian tak tak khawihtu UD&PA mawhphurhna tam tak a awm a. Kum 2017 khan AMRUT atangin Aizawl khawpui tuiluankawr siamna tur project cheng vaibelchhe 57 (Nuai 5700) hmuh a ni a; kha kha khawpui hmelhmang ti danglam dawrh thei khawpa tuiluankawr changtlung tak dinna tham a ni.
Tunah hian tuiluankawr lamah khawpui hi a la pachhe hle mai a, leimin, in chim, etc. tam tak hi chu tuiluankawr mumal loh vang a ni a tih theih awm e.