Khawvel hriatah India rama Kristian tawrhna ka aupui ang – Lalbiakzama

Thlantlin a nih chuan, India rama BJP sawrkar kaihhruaina hnuaia Kristiante tawrhna chu khawvel hriatah a auchhuahpui dawn tih Congress MP candidate Lalbiakzama chuan a sawi.
Champhai district-a a campaign-naah Lalbiakzama chuan, kum 2023 chhung ringawt khan India ram chhung state hrang hrangah Kristian tihduhdahna, missionary-te nekchep leh nghaisakna vawi 687 a thleng nia sawiin, Kristiante tihduhdahna a thlenlai hian engtinnge Mizo Kristiante zingah BJP kan awm theih, tiin a zawt.
Ram danpuiin min humhalh chunga Kristiante dikna chanvo chhuhsaka min nekchep lai hian engatinge kan MP te kha Parliament chhung leh pawnah an auchhuah loh, tia zawtin, “Kristiante tawrhna hi Delhi tlangah press conference-te koin engatinge an puan darh loh? Pathian leh mipui zarah MP-a thlantlin ka nih chuan khawvel hriatah India rama Kristiante tawrhna hi ka auchhuak ang,” a ti.
India danpui 371G chuan Mizo hnam dan min humhalh sak a. Hei hi kan hman tangkai viau a ngai tih Congress candidate hian a sawi. “The Forest Conservation Amendment Bill sawiho a nihlai khan kan MP ten engtin nge an dodal? Uniform Civil Code pawh pass a ni a, tawngkaa Mizoram a tel ve lo ti ngawt loin, India danpui 371G-in a humhalh angin Mizoram chu UCC hian a huam ve lo ang, tiin Rules chhungah an ziak em? A dan chhungah ziaka an dah loh chuan tawngka ringawt chuan a thlamuan thlak loh,” a ti.