Khawvela 100 vel chauh awm tawh ramsa thla la fuh

Khawvela 100 vel chauh awm tawh ramsa thla la fuh
Khawvela a vawi khat nan wildlife researcher-te chuan African ramsa, mang mai hlauhawm leh vâng tak, hmuh zen zen tur awm lo, sazuk chi khat (antelope), Upemba Lechwe chu a thla la fuhin an tichhuak.
Researcher-te hian Democratic Republic of Congo chhim lama Kamalondo Depression an tiha van sang atanga thla an lakah an la fuh a, antelope 10 vel an hmu a, an zavaiin khawvelah 100 pawh an awm tling lova ngaih a ni.
Zirchianna an neiha an hotu, Manuel Weber-a chuan thlalaka an hmuh chuan a tihlimin a ngaihna pawh an hre lo hial zawk tih a sawi.
Upemba Lechwe hi heng lai vela antelope awm ve thin dang ang lo takin an keah rawng thima tial an nei ve ngai lo niin an sawi.
An darah a thim lama de an nei ve ngai lo niin an sawi bawk.
Upemba Lechwe chenna hmun an hmu chhuak thar chu ‘thil siam inmamawh tawn dan anga tehin hmun mak’ a nih thu Weber-a chuan a sawi.
Tlem hmu mah se a venhimna lam chu chona lian tak a nih theih thu a sawi bawk.
Thil tam tak zingah mihring pung zel te, sangha man thin leh heng lai vela ramsa chengte pelh nasat te chu an tan ‘thil hlauhawm’ a ni thei tih a sawi.
Upemba National Park website-a thuchhuah an siamah Weber-a chuan heng ramsa hi ‘mang mai hlauhawm tak zet tawh’ tiin a tar lang.
Upemba Lechwe-te chu ‘hmanhmawh taka venna’ pek a nih loh chuan ‘thamral mai thei’ an nih thu a tar lang a. “Tun hi heng ramsate kan chhan theihna remchang awm chhun a ni thei tawh,” a ti.
African Journal of Ecology-a zir chianna an neih an tar lanah chuan tun hi kum 50 chuang an zawn hnua antelope vâng tak an hmuh vawi khatna a ni.
Thla hi survey an neih ni hnihnaah an la fuh a, Cessna thlawhna tukverh atanga an lak fuh niin Weber-a chuan a sawi a. “An tlanchhiat hmain second reilo te chauh an ding a ni,” a ti.
DR Congo hi ramsa kawl tam ram an ni a, thla pawh lak fuh an ni fo thin a. Kum 2019 pawh khan Virunga National Park-a zawng lian chi, gorilla pahnih leh an ranger thlalak chu a lo darh chiam tawh a ni.